Do‘stlik va hamkorlik sari mustahkam qadam

Joriy yilning avgust oyida O‘zbekiston Respublikasi Prezidenti Shavkat Mirziyoyevning Turkmanistonga rasmiy tashrifi ikki davlat o‘rtasidagi do‘stlik va yaqin qo‘shnichilik munosabatlarini yangi bosqichga olib chiqishda muhim qadam bo‘ldi. Bu tashrif nafaqat siyosiy, iqtisodiy va madaniy hamkorlikni rivojlantirishda, balki butun mintaqada barqarorlik va taraqqiyotni ta’minlashda muhim ahamiyat kasb etmoqda.

O‘zbekiston va Turkmanistonni ko‘p asrlik tarix, umumiy madaniy meros va qadriyatlar bog‘lab turadi. Shu nuqtai nazardan, yurtboshimiz tashabbuslari bilan olib borilayotgan ochiq, o‘zaro ishonch va manfaatga asoslangan tashqi siyosat mamlakatimiz nufuzini xalqaro maydonda yanada oshirmoqda.

Navoiy viloyati, xususan, Navoiy shahri uchun ham ushbu tashrif alohida ahamiyatga ega. Chunki viloyatimiz Turkmaniston bilan transport-kommunikatsiya yo‘nalishlari orqali bog‘langan bo‘lib, ikki davlat o‘rtasidagi savdo-iqtisodiy aloqalarni rivojlantirishda faol ishtirok etmoqda. Prezidentlar darajasida erishilgan kelishuvlar esa viloyatimizning eksport salohiyatini oshirish, yangi ish o‘rinlari yaratish va mahalliy ishlab chiqaruvchilar uchun yangi bozorlar ochish imkoniyatini beradi.

Ayniqsa, logistika, sanoat, qishloq xo‘jaligi va “yashil energiya” sohalaridagi hamkorlik istiqbollari Navoiy shahrida amalga oshirilayotgan islohotlarga to‘liq hamohangdir. Davlat rahbarimizning har bir tashrifida, har bir muzokarasida xalq manfaati, fuqarolar farovonligi ustuvor o‘rin egallayotganini mamnuniyat bilan qayd etish kerak.

O‘zbekiston Prezidentining Turkmanistonga tashrifi yaqin qo‘shnichilik, do‘stlik va strategik sheriklik rishtalarini yanada mustahkamlayotganini ko‘rsatdi. Bu esa biz, mahalliy kengash deputatlari zimmasiga ham katta mas’uliyat yuklaydi — ya’ni markazdagi tashabbus va kelishuvlarni joylarda samarali amalga oshirish, xalqimiz farovonligi yo‘lida izchil ishlash vazifasi.

Shu munosabat bilan, men Navoiy shahar Kengashi deputati sifatida O‘zbekiston Respublikasi Prezidenti olib borayotgan samarali tashqi siyosatni to‘liq qo‘llab-quvvatlayman. Ishonamanki, bugungi do‘stlik va hamkorlik poydevori kelajak avlodlar uchun mustahkam tayanch bo‘ladi.

🇺🇿 Xalq deputatlari Navoiy shahar Kengashi deputati

Murodov Nodirjon Abdulloyevich