Deputat, isbilermen ushırasıwları.

Ózbekstan XDP Bozataw rayonlıq Keńesi, ÓzXDP deputatlıq toparı aǵzası G.Yusupova hám tiyisli qánigeler menen birgelikte rayon aymaǵında, isbilermenler menen ushırastı.

Mámleketimiz ekonomikasında kishi biznes hám jeke isbilermenliktiń ornı hám abıroyı asıp barıwda. Isbilermenlik subektlerin hár tárepleme qollap-quwatlaw boyınsha ámelge asırılıp atırǵan keń kólemli is-ilájlar múlkdarlardıń orta qatlamın qáliplestiriw, ishki bazarda básekiles ónimler menen toltırıw, jańa jumıs orınların jaratıw barısında xalıqtıń dáramatların kóbeytiriw hám párawanlıǵın asırıwǵa xızmet etip atır.

Ózbekstan Respublikası Prezidenti qararları tiykarında óz isbilermenligin rawajlandırıw ushın jeńilletilgen payızdaǵı kreditler alıp óziniń isbilermenlik subektlerin jolǵa qoyǵan hám keńeyttirilgen JSHJ karxanalarında bolıp deputatlıq qadaǵalawǵa alınıp uyrenilip shıǵıldı. Ózbekstan Respublikası Prezidentiniń “Isbilermenlik iskerliginiń jedel rawajlanıwın támiyinlewge, jeke múlkti hár tárepleme qorǵawǵa hám isbilermenlik ortalıǵın sapalıq tárepinen jaqsılıwǵa tiyisli qosımsha is-ilájlar haqqında” ǵı PF-4848-sanlı Pármanında mámleket organları, birinshi náwbette, huqıqtı qorǵawshı uyımlar moynına isbilermenlik subektleriniń huqıqlı hám nızamlı mápleri ústinligi principiniń sózsiz ámelge asırılıwın támiyinlew wazıypası júkletilip, kishi biznes hám jeke isbilermenlikke keń erkinlik beriw, olardıń iskerligine mámleket iskerliginiń aralasıwın qısqartıw, huqıqbuzarlıqlardıń aldın alıw, olardıń profilaktikasınıń sapasın asırıw hám huqıqbuzarlıqqa jol qoymaw, mámleket organlarınıń birinshi dárejeli wazıypası etip belgilengenligin ayrıqsha aytıp ótiw kerek.
Pármanǵa muwapıq isbilermenlik iskerligine nızamǵa qayshı jol menen aralasıw hám tosqınlıq etiw, olardıń iskerligin tiykarsız toqtatıp qoyıw ushın lawazımlı shaxslardıń juwapkershiligi haqqındaǵı nızam xújjetleri normaları talapları qatań orınlanıwı, sonday-aq isbilermenlik subektlerine jetkizilgen zıyannıń tuwrıdan-tuwrı ayıplanıwshılardan óndiriliwin támiyinlew belgilendi.
Mámleketimizde isbilermenlik iskerligin tártipge salıwshı nızam hújjetlerin jetilistiriw boyınsha ámelge asırılıp atırǵan reformalardıń tiykarǵı jónelislerinen biri rejeden tısqarı hám alternativ tekseriwlerdi qısqartıw, hákimshilik jınayat nızamshılıǵın liberallastırıw, salıq jeńilliklerin engiziw kólemin keńeytiriw bolıp esaplanadı.