Xalq deputatlari Chilonzor tuman Kengashining “Chilonzor tumanida “Dolzarb 90 kun” loyihasini amalga tatbiq etish orqali yozgi ta’til davrida mahallalarda va umumta’lim maktablarida yoshlarning bo‘sh vaqtlarini mazmunli hamda samarali tashkil etish chora-tadbirlari to‘g‘risida”gi III-22-66-14-204-K/26-son qaroriga muvofiq tumanda yoshlarni tadbirkorlik faoliyatiga keng jalb etish hamda ularda zamonaviy biznes ko‘nikmalarini shakllantirishga qaratilgan amaliy ishlar izchil davom ettirilmoqda.

Mazkur qaror ijrosi doirasida iyun–avgust oylarida respublika miqyosida “Mini-biznes loyihalar” biznes-rejalar tanlovi tashkil etiladi.

Tanlovning asosiy maqsadi yoshlarning innovatsion va istiqbolli biznes g‘oyalarini qo‘llab-quvvatlash, ularning tadbirkorlik tashabbuslarini rag‘batlantirish hamda o‘z biznesini yo‘lga qo‘yishi uchun zarur sharoit yaratishdan iborat.

Tanlovda ishtirok etib, eng yaxshi biznes-rejalarni taqdim etgan yoshlarga tadbirkorlik faoliyatini boshlashlari uchun tijorat banklari tomonidan amaldagi tartibda imtiyozli kreditlar ajratilishi nazarda tutilgan.

Mazkur tadbirlar Chilonzor tumani Savdo-sanoat palatasi hamda tijorat banklari mablag‘lari hisobidan amalga oshiriladi.