Xalq deputatlari Termiz shahar Kengashining 12-“Saxovat” saylov okrugi deputati X.Jurayev hamda Kengash kotibiyati bosh mutaxassisi A.Temirovlar okrugga qarashli “Tinchlik” mahallasida bo‘lib, navbatdagi nazorat-tahlil tadbirlarini o‘tkazdilar.

💬O‘rganish jarayoni mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari doirasida hamda O‘zbekiston Respublikasining 2016-yil 14-sentabrdagi O‘RQ-406-sonli “Yoshlarga oid davlat siyosati to‘g‘risida”gi Qonuni talablari asosida tashkil etildi.

💬Tashrif davomida yoshlar yetakchisining mahalla yoshlari bilan ishlash tizimi quyidagi muhim yo‘nalishlar kesimida atroflicha ko‘rib chiqildi:

🟢Yoshlar bandligi va tadbirkorligini qo‘llab-quvvatlash: Mahalladagi ishsiz yoshlar xatlovi natijalari, ularni doimiy ish o‘rinlariga joylashtirish, "Yoshlar daftari" imkoniyatlari orqali subsidiya va imtiyozli kreditlar ajratilishining haqqoniyligi va manzilliligi;

🟢Bo‘sh vaqtni mazmunli tashkil etish: Yoshlarning kitobxonlik va intellektual salohiyatini oshirish, "Besh tashabbus olimpiadasi" doirasida sport musobaqalari va madaniy to‘garaklarning o‘tkazilish sifati;

🟢Huquqbuzarliklar profilaktikasi: Yoshlar o‘rtasida jinoyatchilik va huquqbuzarliklarning barvaqt oldini olish borasida profilaktika inspektori bilan hamkorlikda olib borilayotgan tushuntirish va targ‘ibot ishlari;

🟢Toifalar bilan ishlash samaradorligi: Mahalladagi yoshlarning "yashil", "sariq" va "qizil" toifalar kesimidagi reyestri hamda ijtimoiy himoyaga, ruhiy ko‘makka muhtoj bo‘lgan yoshlar bilan individual (manzilli) ishlash holati.

💬"Prezidentimiz tomonidan yoshlar uchun yaratib berilayotgan imkoniyatlar har bir mahallada to‘liq va adolatli ishlashi lozim. Yoshlar yetakchisining faoliyati shunchaki rasmiy hisobotlar yoki statistik raqamlar bilan emas, balki hayotda o‘z yo‘lini topgan, ishli bo‘lgan va muammosi hal etilgan yoshlar soni bilan baholanadi. 'Tinchlik' mahallasida yoshlar bilan ishlash tizimining mukammalligi bizning doimiy nazoratimizda bo‘ladi," — deya ta'kidladi deputat X.Jurayev.

🫥O‘rganish yakunida yoshlar yetakchisiga "sariq" va "qizil" toifadagi yoshlar bilan ishlash tizimini yanada jadallashtirish, ularni zamonaviy kasb-hunar va IT-texnologiyalarga o‘qitish qamrovini kengaytirish hamda aniqlangan ayrim kamchiliklarni bartaraf etish bo‘yicha tizimli tavsiyalar berildi.