Xalq deputatlari tuman Kengashining navbatdagi sessiyasi kun tartibiga tuman hokimligi huzuridagi “Infratuzilma va ijtimoiy barqarorlik” jamg‘armasi hamda “Ijtimoiy daftarlar” jamg‘armasi mablag‘larining maqsadli sarflanishi, ajratilgan mablag‘larning samaradorligi va amalga oshirilgan ishlar holatini o‘rganish yuzasidan tuman “Inson” markazi rahbarining hisoboti kiritilmoqda.

Mazkur masalani sessiyada atroflicha muhokama qilish hamda jamg‘arma mablag‘laridan foydalanishning shaffofligi va samaradorligini baholash maqsadida deputatlarga o‘z saylov okruglarida o‘rganishlar olib borish tavsiya etildi. Xususan, jamg‘armalar mablag‘lari hisobidan amalga oshirilgan loyihalar, ijtimoiy yordam va ko‘mak tadbirlarining manzilliligi, ehtiyojmand fuqarolarga ko‘rsatilgan yordamlarning holati hamda ajratilgan mablag‘larning maqsadli sarflanishi yuzasidan joylarda tahliliy o‘rganishlar tashkil etilishi belgilandi.

Shuningdek, deputatlarga fuqarolar bilan uchrashuvlar o‘tkazish, ularning fikr va takliflarini o‘rganish, mavjud muammo va kamchiliklarni aniqlash hamda jamg‘arma mablag‘laridan foydalanish samaradorligini yanada oshirish bo‘yicha asoslantirilgan takliflar ishlab chiqish tavsiya qilindi.