Hududdagi jinoyatchilikka qarshi kurashish, ayniqsa “qizil” va “sariq” toifadagi hududlarda huquqbuzarliklarning oldini olish bo‘yicha amalga oshirilayotgan ishlar doirasida Xalq deputatlari Ishtixon tumani Kengashi deputati M. Raximov tomonidan o‘z hududidagi 67-maktab bitiruvchilari bilan uchrashuv o‘tkazildi.

Uchrashuv davomida yoshlar o‘rtasida jinoyatchilikni barvaqt oldini olish, ularning huquqiy ongini va mas’uliyatini oshirish masalalariga alohida e’tibor qaratildi. Ayniqsa, so‘nggi vaqtlarda keng tarqalayotgan firibgarlik holatlari hamda kiberjinoyatlar haqida batafsil tushuntirish berildi.

Bitiruvchilarga internet tarmog‘ida ehtiyotkor bo‘lish, turli noma’lum va begona Telegram-botlar hamda shubhali havolalarga kirmaslik, ularning rasmiyligini tekshirmasdan foydalanmaslik zarurligi ta’kidlandi. Shuningdek:

shaxsiy ma’lumotlarni (pasport ma’lumoti, bank karta raqami, SMS-kodlar va boshqalar) begona shaxslarga bermaslik;

ijtimoiy tarmoqlarda shubhali sahifalar va e’lonlarga ishonmaslik;

turli “yutuq”, “pul ishlash” yoki “tez daromad” va’dalariga aldanmaslik;

noma’lum kontentlarga “layk” bosish yoki ulashish orqali javobgarlik yuzaga kelishi mumkinligi haqida ogohlantirildi.

Deputat tomonidan yoshlarning axborot xavfsizligini ta’minlash bugungi kunda jinoyatchilikka qarshi kurashning muhim yo‘nalishlaridan biri ekanligi qayd etildi. Ayniqsa, kiberjinoyatlar ko‘pincha yoshlarning ishonuvchanligi va beparvoligidan foydalanib sodir etilayotgani misollar orqali tushuntirib berildi.

Uchrashuv yakunida bitiruvchilar o‘zlarini qiziqtirgan savollarga javob oldilar hamda qonunlarga hurmat bilan qarash, hushyorlikni yo‘qotmaslik va har qanday shubhali holatda mas’ul idoralarga murojaat qilish zarurligi ta’kidlandi.

Bunday profilaktik uchrashuvlar yoshlar o‘rtasida huquqbuzarliklarning oldini olish, kiberxavfsizlik madaniyatini shakllantirish hamda hududda jinoyatchilikni kamaytirishga xizmat qiladi.