Bugungi kunda mamlakatimizda sportni ommalashtirish, aholi o‘rtasida sog‘lom turmush tarzini targ‘ib qilish hamda mamlakatning xalqaro sport maydonlarida munosib ishtirok etishini taʼminlash davlat siyosatining muhim yo‘nalishlaridan biri hisoblanadi.

Shu maqsadda Senatning Yoshlar, xotin-qizlar, madaniyat va sport masalalari qo‘mitasi tomonidan tegishli vazirlik va idoralar bilan birgalikda Toshkent viloyati mahallalarida sport infratuzilmasini rivojlantirish va sport maydonchalaridan samarali foydalanishni tashkil etish borasida amalga oshirilgan ishlar holati o‘rganilmoqda.

O‘zbekiston Respublikasi Prezidentining 2023-yil 28-iyuldagi “Mahallalarda sport infratuzilmasini rivojlantirish va sport maydonchalaridan samarali foydalanishni tashkil etish chora-tadbirlari to‘g‘risida” 245-sonli qarorida “Besh tashabbus olimpiadasi” doirasida g‘olib va sovrindor bo‘lgan hamda hududida sport infratuzilmasi mavjud bo‘lmagan mahalla terma jamoalari uchun 2023 yilda 56 ta, 2024-yilda esa 50 ta sport maydonchasi qurilishi belgilangan.

Ishchi guruh sport maydonchalarining holatini o‘rganish maqsadida Qibray, Piskent, Bo‘ka, Bekobod, O‘rta Chirchiq, Yuqori Chirchiq, Toshkent tumani tumanlari hamda Nurafshon, Bekobod va Olmaliq shaharlarida o‘rganishlar olib bordi.

Dastlab Nurafshon shahridagi “Obod turmush”, “Oppoq”, O‘rta Chirchiq tumanidagi “Burgalik”, Qibray tumanidagi “Obod”, “Navbahor”, Toshkent tumanidagi “A.Navoiy” mahallalarida va taʼlim muassasalarida yoshlarning sport bilan shug‘ullanishlari uchun yaratilgan shart-sharoitlar bilan tanishildi.

O‘rganish davomida sport maydonchalarining foydalanish uchun yaroqsiz holga kelib qolganligi, sport obyektlarining atrofi o‘ralmaganligi, sport anjomlarining yetishmovchiligi, shuningdek, nogironligi bo‘lgan shaxslar uchun yetarli sharoitlar yaratilmaganligi kabi kamchiliklar aniqlandi.

Ishchi guruh tomonidan aholini sportga keng jalb qilish, mavjud infratuzilmani takomillashtirish va qo‘shimcha qulayliklar yaratish bo‘yicha tegishli tavsiyalar berildi.

O‘rganish natijalari xalq deputatlari mahalliy Kengash deputatlari, mutasaddi vazirlik va idoralar hamda ularning hududiy boshqarmalari rahbarlari ishtirokida Senat qo‘mitasi majlisida muhokama etiladi.

Ishchi guruhning Toshkent viloyatidagi o‘rganishlari davom etmoqda.