SOG‘LOM HAYOT SARI YANGI QADAM: BANDIXONDA ZAMONAVIY FITNES MARKAZI ISH BOSHLADI

🚨Bandixon tumanida aholi o‘rtasida sog‘lom turmush tarzini keng targ‘ib qilish, yoshlar va xotin-qizlarning sport bilan muntazam shug‘ullanishlari uchun munosib sharoitlar yaratish borasida yana bir xayrli ishga qo‘l urildi. Tumanda zamonaviy andozalar asosida jihozlangan yangi fitnes sport zali tantanali ravishda foydalanishga topshirildi.

🚨Yangi sport maskanining ochilish marosimida Xalq deputatlari Bandixon tumani Kengashi deputati, tuman hokimi Abdumalik Allamuradov, mahalla nuroniylari hamda sportchi yoshlar ishtirok etishdi.

🚨Tadbirda so‘zga chiqqanlar so‘nggi yillarda mamlakatimizda jismoniy tarbiya va sportga qaratilayotgan yuksak e’tibor aholi salomatligini mustahkamlashda bosh omil bo‘layotganini ta’kidladilar. Mazkur fitnes zali nafaqat yoshlar, balki nuroniylar, davlat xizmatchilari va xotin-qizlar uchun ham ochiq bo‘ladi. Xususan, ayollarning sport bilan shug‘ullanishlari uchun alohida vaqt ajratilib, har kuni soat 10:00 dan 13:00 ga qadar faqatgina xotin-qizlar uchun xizmat ko‘rsatilishi belgilandi.

✅Chempionlar e’tirofi

🚨Ochilish marosimi doirasida tuman sharafini xalqaro arenalarda munosib himoya qilib kelayotgan yosh sportchilarni taqdirlash marosimi ham bo‘lib o‘tdi. Jumladan, joriy yilning 13–18-oktabr kunlari Toshkent shahrida o‘tkazilgan Jahon kubogida muvaffaqiyatli ishtirok etgan 6 nafar bandixonlik yosh sportchi, shuningdek, paraolimpiya yo‘nalishidagi "Special Olimpiada"da faxrli o‘rinlarni qo‘lga kiritgan qahramonlarimizga tuman hokimligining diplom va esdalik sovg‘alari topshirildi.

🚨Ushbu yangi sport maskani Bandixon ahlining jismoniy faolligini oshirish, mazmunli hordiq chiqarish va yangi chempionlarni kashf etish yo‘lida muhim bazaga aylanishi shubhasiz.