O‘zbekiston Respublikasi Prezidentining PQ–406-son qarori hamda Oliy Majlis Senati Kengashining KQ–35-V-son qarori ijrosini ta’minlash, shuningdek, mahalliy Kengash deputatlari faoliyatining eng muhim yo‘nalishlari bo‘yicha belgilangan 24 ta tavsiya doirasida 3-Guliston saylov okrugida joylashgan “Qashqar” MFY hududidagi “Falak shoes” erkaklar oyoq kiyimlarini ishlab chiqarish korxonasi faoliyati bilan tanishildi.

Xalq deputatlari Marg‘ilon shahar Kengashi deputati, shahar hokimi E.Rustamov korxonada bo‘lib, tadbirkor A.Nurmatov rahbarligida olib borilayotgan ishlab chiqarish jarayoni, yaratilgan ish o‘rinlari va mahsulotlarni sotish yo‘nalishlari bilan tanishdi.

Bugungi kunda korxonada 120 ta doimiy ish o‘rni yaratilgan. Bu esa hudud aholisini ish bilan ta’minlash va oilalar daromadini oshirishga xizmat qilmoqda. Korxonada erkaklar uchun oyoq kiyimlarining 17 turi ishlab chiqarilib, shu paytgacha mahsulotlar asosan ichki bozorga yetkazib berilgan.

E’tiborlisi, korxona mahsulotlarini eksport qilish yo‘nalishida ham yangi qadamlar qo‘yildi. Endilikda “Falak shoes” mahsulotlari Qozog‘iston va Tojikiston bozorlariga ham chiqarila boshlandi. Bu korxonaning ishlab chiqarish salohiyatini kengaytirish, yangi bozorlarni egallash va mahalliy mahsulotlar raqobatbardoshligini oshirish uchun muhim imkoniyatdir.

O‘rganish davomida E.Rustamov tadbirkor bilan ishlab chiqarish hajmini yanada oshirish, faoliyatni kengaytirish va qo‘shimcha ish o‘rinlarini yaratish masalalarini muhokama qildi. Shuningdek, ushbu maqsadlarga erishish uchun zarur imkoniyat va sharoitlarni yaratish, tadbirkorlik tashabbuslarini qo‘llab-quvvatlash borasida amaliy ko‘mak ko‘rsatishga tayyorligini bildirdi.

Bunday korxonalar faoliyatini rivojlantirish nafaqat yangi ish o‘rinlarini yaratish, balki Marg‘ilon shahrining sanoat salohiyatini mustahkamlash va eksport hajmini oshirishda ham muhim o‘rin tutadi. Shu bois tadbirkorlik subyektlarini qo‘llab-quvvatlash hamda aholi bandligini ta’minlashga qaratilgan ishlar deputatlik nazorati doirasida davom ettiriladi.