Xiva shahrida ikki mamlakat parlamentlari a’zolari, hududlari, ishbilarmon doiralari vakillari, yoshlar va ekspertlar hamjamiyatini birlashtirgan To‘rtinchi O‘zbekiston – Belarus parlamentlararo forumi o‘z ishini yakunladi.

29-30-sentabr kunlari davomida forum ishtirokchilari O‘zbekiston – Belarus parlamentlararo va hududlararo hamkorligini yanada rivojlantirish istiqbollarini, shuningdek, ishbilarmonlik va gumanitar aloqalarni kengaytirish masalalarini muhokama qildilar.

O‘zbekiston Respublikasi Oliy Majlisi Senati Raisi Tanzila Narbayeva o‘z nutqida o‘zaro hamkorlikning yangi formati hamkorlikning bevosita ishtirokchilari doirasini kengaytirish, parlament faoliyatining hududlar va ishbilarmon doiralar ehtiyojlari bilan aloqasini mustahkamlash imkonini berganini ta’kidladi.

Forum davomida qo‘shma korxonalarni rivojlantirish, yangi ish o‘rinlari yaratish, kadrlar tayyorlash, ta’lim va ijtimoiy imkoniyatlarni kengaytirish, shuningdek, tadbirkorlik tashabbuslarini qo‘llab-quvvatlash masalalariga alohida e’tibor qaratildi.

Erishilgan kelishuvlar izchillik bilan bajarilishini ta’minlash muhimligi ta’kidlandi. Parlamentlararo komissiya tegishli qo‘mitalar bilan birgalikda tegishli idoralar, hududlar va ishbilarmon doiralar bilan hamkorlikni qo‘llab-quvvatlagan holda belgilangan tadbirlarning amalga oshirilishini muntazam ravishda ko‘rib chiqishi lozim.

Forum doirasida xalq deputatlari viloyat Kengashi raisi Abdurayim Choriyev hamda Kengashning Korrupsiyaga qarshi kurashish va xavfsizlik masalalari bo'yicha doimiy komissiyasi raisi Gennadiy Kravchenyalar ishtirok etib, O‘zbekiston va Belarus o‘rtasidagi amaliy hamkorlikni rivojlantirishga qaratilgan shartnoma, bitim va memorandumlar imzoladi.

Forum davomida o‘rnatilgan ishbilarmonlik va professional aloqalar yanada rivojlanib, barqaror sheriklik aloqalari va qo‘shma loyihalarga aylanishi ta’kidlandi.

Ochiq osmon ostidagi muzey-shahar Xivada yakunlangan forum ikki mamlakat o‘rtasidagi do‘stona muloqotning ramziy davomi bo‘ldi. Tomonlar uchrashuvlar davomida erishilgan kelishuvlar O‘zbekiston – Belarus strategik sheriklik munosabatlarini yanada mustahkamlash va ikki davlat xalqlari farovonligi yo‘lida amaliy hamkorlikni kengaytirishga xizmat qilishiga ishonch bildirdilar.

Forum yakunida hamkorlikning umumiy yo‘nalishlarini belgilab beruvchi Xiva deklaratsiyasi qabul qilindi. Uning qoidalari imzolangan 2026 – 2027 yillarga mo‘ljallangan parlamentlararo “yo‘l xaritasi” bilan bog‘liq holda amalga oshiriladi.