O‘rganish jarayonida O‘zbekiston Respublikasi Prezidenti Sh.M. Mirziyoyev raisligida o‘tkazilgan videoselektor yig‘ilishida belgilangan vazifalar ijrosini ta’minlash masalalariga alohida e’tibor qaratildi. Unda mahalla yettiligi rahbarlari, ko‘chaboshilar hamda faol oqsoqollar ishtirok etdi.

Jumladan, kambag‘allikni qisqartirish, aholi daromadlarini oshirish, bandlikni ta’minlash, xonadonlarning daromad manbalarini ko‘paytirish, shuningdek, tadbirkorlik va aholining tashabbuslarini qo‘llab-quvvatlash borasida amalga oshirilayotgan ishlar tahlil qilindi.

Shuningdek, mahallada obodonlashtirish va ko‘kalamzorlashtirish, hududlarni tartibga keltirish, ko‘cha va yo‘laklarning tozaligi, sanitariya holatini yaxshilash, chiqindilarni belgilangan tartibda olib chiqish hamda atrof-muhitni ozoda saqlash masalalari ham ko‘rib chiqildi.

O‘rganish yakunlari bo‘yicha mahalla hududida mavjud muammolarni aniqlash va ularni manzilli hal etish, aholi uchun qulay va munosib yashash sharoitlarini yaratish yuzasidan mas’ullarga tegishli topshiriq va ko‘rsatmalar berildi.

Asosiy maqsad — mahallalarda obodlik va farovonlikni ta’minlash, aholi uchun munosib yashash sharoitlarini yaratish hamda “Yangi O‘zbekiston qiyofasi”ni har bir mahallada amalda namoyon etishdir.