Kuni kecha Xalq deputatlari Marg‘ilon shahar Kengashi deputati M.Abdurahmonova o‘z saylov okrugida bo‘lib, saylovchilar bilan uchrashuvlar o‘tkazdi hamda hududdagi obodonlashtirish va infratuzilma holatini o‘rgandi.

O‘rganishlar davomida fuqarolar tomonidan bildirilgan murojaatlar va aniqlangan muammolar deputatning “Ko‘cha aylanish daftari”ga qayd etildi.

Xususan, Mashad mahallasi Imom Zahiriddin ko‘chasidan o‘tuvchi tranzit ariq uzoq vaqt davomida tozalanmaganligi oqibatida suv oqimi cheklanib, sanitariya holati yomonlashgani aniqlandi. Shuningdek, Mashad mahallasining Zarafshon va Turkiston ko‘chalarida daraxtlarning o‘sib ketgan shox-shabbalari yo‘l harakati belgilarini to‘sib qo‘ygani hamda ko‘cha yoritish chiroqlari samaradorligini pasaytirib, harakat xavfsizligiga salbiy ta’sir ko‘rsatayotgani qayd etildi.
Aniqlangan muammolarni qisqa muddatlarda bartaraf etish maqsadida deputat tomonidan Marg‘ilon shahar Obodonlashtirish boshqarmasi boshlig‘i nomiga rasmiy deputat so‘rovi kiritildi.

Mazkur masalalarning ijrosi deputatlik nazoratiga olindi.