Xalq deputatlari Chilonzor tumani Kengashi deputati Maxmudova Donoxon Artikovna tomonidan Chilonzor tumani Elektr ta’minoti korxonasi rahbari Turaev Zoir Xasanovich nomiga O‘zbekiston Respublikasi Vazirlar Mahkamasining 2009-yil 22-avgustdagi 245-son qarori bilan tasdiqlangan “Elektr energiyasidan foydalanish qoidalari” ijrosi yuzasidan deputatlik so‘rovi yuborildi.

Deputatlik so‘rovida ta’kidlanishicha, so‘nggi vaqtlarda saylov okrugi hududida istiqomat qiluvchi fuqarolar hamda faoliyat yuritayotgan tadbirkorlik subyektlaridan elektr energiyasi ta’minoti sifati, tarmoqlarda tez-tez kuzatilayotgan uzilishlar, kuchlanishning pasayib ketishi va tizimdagi boshqa kamchiliklar yuzasidan ko‘plab murojaatlar kelib tushgan.

Mazkur murojaatlar asosida deputat amaldagi qonunchilik talablariga tayanib, elektr ta’minoti korxonasi faoliyatida Vazirlar Mahkamasining 245-son qarori bilan belgilangan normalarning amalda qanday bajarilayotgani yuzasidan rasmiy tushuntirish talab qildi.

Deputatlik so‘rovida, xususan, quyidagi masalalarga alohida e’tibor qaratilgan:

- saylov okrugi hududida elektr energiyasini uzluksiz va sifatli yetkazib berish hamda sifat nazoratini ta’minlash bo‘yicha amalga oshirilayotgan tizimli ishlar;
- elektr tarmoqlarida kuzatilayotgan kuchlanish pasayishi va rejadan tashqari uzilishlarni bartaraf etish yuzasidan belgilangan chora-tadbirlar;
- rejali ta’mirlash ishlari sababli elektr ta’minotida uzilishlar yuzaga kelganda iste’molchilarni kamida 3 kun oldin ogohlantirish talabi qanday ijro etilayotgani.

Shuningdek, deputat elektr energiyasi bilan ta’minlashda iste’molchilarning qonuniy huquqlari, ta’minotchi korxonaning shartnoma majburiyatlari hamda elektr energiyasi sifatiga oid talablarning amalda ta’minlanishi masalasiga alohida urg‘u bergan.

Xalq deputatlari Chilonzor tumani Kengashi deputatlari fuqarolar va tadbirkorlik subyektlarining murojaatlarini o‘rganish, hududdagi muammolarni qonuniy asosda tegishli tashkilotlar oldida ko‘tarish hamda ularning ijrosini nazorat qilish bo‘yicha o‘z vakolatlari doirasida tizimli faoliyatni davom ettirmoqda.