Xalq deputatlari Shirin shahar Kengashi bosh mutaxassislari N. Nazarova va X. Rahmatullayevlar tomonidan 1-sonli maktabgacha ta’lim tashkilotining faoliyati hamda yangi binoda bolajonlar uchun yaratilgan shart-sharoitlar o‘rganildi.

Mazkur loyiha O‘zbekiston Respublikasi Prezidentining 2025-yil 6-martdagi PQ-93-son qarori asosida amalga oshirilgan bo‘lib, qurilish ishlari uchun jami 4 milliard 200 million so‘m mablag‘ yo‘naltirilgan.

O‘rganish davomida maktabgacha ta’lim tashkilotining moddiy-texnik bazasi, tarbiyalanuvchilar uchun yaratilgan zamonaviy shart-sharoitlar, ta’lim-tarbiya jarayonining tashkil etilishi hamda bino va hududning sanitariya-gigiyena va xavfsizlik talablariga muvofiqligi ko‘zdan kechirildi.

Ta’kidlash joizki, muassasaning avvalgi binosi 1969-yilda qurilgan bo‘lib, 110 nafar tarbiyalanuvchiga mo‘ljallangan edi. Yillar davomida bino eskirib, zamonaviy talablar asosida ta’lim-tarbiya jarayonini tashkil etish uchun yetarli sharoitga ega bo‘lmay qolgan.

Yangi binoning foydalanishga topshirilishi natijasida esa 170 o‘ringa mo‘ljallangan, zamonaviy talablar asosida jihozlangan, yorug‘, shinam va xavfsiz ta’lim-tarbiya maskani yaratildi. Muassasada tarbiyalanuvchilarning har tomonlama rivojlanishi, ta’lim-tarbiya olishi, bo‘sh vaqtini mazmunli o‘tkazishi va sog‘lom muhitda kamol topishi uchun zarur sharoitlar yaratilgan.

O‘rganish yakunida yangi maktabgacha ta’lim tashkilotida yaratilgan imkoniyatlar ijobiy baholanib, bolalarga sifatli ta’lim-tarbiya berish, mavjud shart-sharoitlardan samarali foydalanish hamda muassasa faoliyatini yanada takomillashtirish bo‘yicha tegishli tavsiyalar bildirildi.