Tashkilot rahbari va deputat tomonidan moliya bo'limi byudjetining ustuvor yo‘nalishlari muhokama qilindi

Xalq deputatlari Angren shahar Kengashining Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi a’zosi, deputat A. Nazirov tomonidan o‘ziga biriktirilgan tashkilot – Angren shahar Iqtisodiyot va moliya bo‘limi boshlig‘i o‘rinbosari J. Yuldashev bilan ishchi uchrashuv o‘tkazildi.

Uchrashuv davomida kelgusi davr uchun mahalliy byudjetni shakllantirish jarayonlari, byudjet mablag‘larini samarali va maqsadli rejalashtirish, ustuvor yo‘nalishlarga moliyaviy resurslarni yo‘naltirish hamda hududni ijtimoiy-iqtisodiy rivojlantirishga qaratilgan tadbirlarni moliyalashtirish masalalari muhokama qilindi.

Shuningdek, mahalliy byudjet mablag‘laridan oqilona foydalanish, byudjet intizomini mustahkamlash, mavjud moliyaviy imkoniyatlarni kengaytirish hamda kelgusida amalga oshirilishi rejalashtirilayotgan loyiha va dasturlarni moliyalashtirish bo‘yicha fikr almashildi.

Deputat tomonidan byudjet mablag‘larining shaffofligi va samaradorligini ta’minlash, aholi manfaatlariga xizmat qiluvchi loyihalarni ustuvor ravishda qo‘llab-quvvatlash hamda ularning ijrosi ustidan deputatlik nazoratini kuchaytirish yuzasidan tegishli taklif va tavsiyalar bildirildi.

Xalq deputatlari Angren shahar Kengashining doimiy komissiyasi tomonidan mahalliy byudjet mablag‘larining shakllantirilishi va ulardan samarali foydalanish yuzasidan deputatlik nazorati tizimli ravishda davom ettirilmoqda.