O‘RABOSHI MAHALLASIDA AMALGA OSHIRILAYOTGAN BUNYODKORLIK ISHLARI DEPUTAT TOMONIDAN O‘RGANILDI

Xalq deputatlari Quva tuman Kengashi deputati O.Oripova, Kengash huzuridagi Yoshlar maslahat guruhi a’zosi J.Abdurashidov hamda tuman Kengashi kotibiyati bosh mutaxassisi A.Fozilov tomonidan O‘raboshi mahalla fuqarolar yig‘inida amalga oshirilayotgan bunyodkorlik va obodonlashtirish ishlari joyiga chiqib o‘rganildi. 

O‘rganish davomida “Yangi O‘zbekiston qiyofasidagi mahalla” dasturi doirasida “PLANDEM” MChJ tomonidan O‘raboshi ko‘chasida olib borilayotgan qurilish ishlari ko‘zdan
kechirildi. Xususan, mahalla hududida barpo etilayotgan 3 kilometr uzunlikdagi piyodalar yo‘laklari qurilishining sifati, ishlarning belgilangan loyiha va muddatlar asosida olib borilishi hamda qurilish jarayonining holati o‘rganildi. 

Shuningdek, qurilish ishlari davomida e’tibor qaratilishi lozim bo‘lgan masalalar yuzasidan mas’ul tashkilot vakiliga deputat tomonidan tegishli tavsiyalar berildi. 

O‘rganish yakunida ko‘cha boshi O.To‘ychiyev tomonidan ko‘tarilgan takliflar tinglanib, ular “Deputatning ko‘cha aylanish daftari”ga qayd etildi. Bildirilgan masalalarni bartaraf etish yuzasidan tegishli tashkilotlar bilan hamkorlikda amaliy choralar ko‘rilishi hamda ijrosi deputatlik nazoratiga olinishi belgilandi.