Deputatlik nazorati doirasida qurilish jarayoni va mavjud muammolar o‘rganildi

Xalq deputatlari Toyloq tumani Kengashining 8-"Baxshitepa" saylov okrugi deputati Fotex Raxmatov, tuman Kengashi kotibiyati xodimi, tuman tibbiyot birlashmasi mas'ullari hamda tuman Kengashi deputatlari bilan birgalikda 11-oilaviy poliklinika qurilish maydonida o‘rganish ishlarini olib bordi.

O‘rganish davomida qurilish ishlari holati, mavjud sharoitlar hamda hududdagi muammolar atroflicha tahlil qilindi. Xususan, poliklinika hovlisida joylashgan qurigan va qisman singan daraxtlarni belgilangan tartibda bartaraf etish uchun Toyloq tumani Ekologiya bo‘limining tegishli xulosasi o‘z vaqtida taqdim etilmayotganligi aniqlandi.

Mazkur masala deputat tomonidan "Deputat daftari"ga qayd etilib, muammoni qonunchilik talablariga muvofiq hal etish hamda tegishli choralar ko‘rish yuzasidan mas'ul tashkilotga deputatlik so‘rovi yuborildi.