СУВ ТАЪМИНОТИНИ ЯХШИЛАШ БЎЙИЧА АМАЛГА ОШИРИЛАЁТГАН ИШЛАР МУҲОКАМА ҚИЛИНДИ
Халқ депутатлари Янгиқўрғон тумани Кенгашида доимий комиссия йиғилиши давом этмоқда.
Йиғилишда туман сув етказиб бериш хизмати томонидан Ўзбекистон Республикаси Президентининг 2026 йил 24 апрелдаги ПФ–68-сонли Фармони ижроси юзасидан амалга оширилаётган ишлар тўғрисида ахборот берилди.
Маълум қилиндики, 2026–2028 йилларда ер майдонларини қайта фойдаланишга киритиш ва сув таъминотини яхшилаш бўйича дастур ишлаб чиқилган. Ушбу дастур доирасида Янгиқўрғон туманида умумий қиймати 17 млрд 443,6 млн сўм бўлган икки муҳим лойиҳани амалга ошириш режалаштирилган.
Жумладан, қиймати 16 млрд 800 млн сўм бўлган Хадикент каналини реконструкция қилиш орқали тумандаги 4 500 гектар ер майдони, 65 та фермер хўжалиги ҳамда 3 та МФЙ ҳудудидаги 1 300 та аҳоли томорқасининг сув таъминотини яхшилаш кўзда тутилган. Канал реконструкция қилинса, йилига ўртача 3,5 млн куб метр сув йўқотилишининг олди олинади.
Шунингдек, қиймати 643,6 млн сўм бўлган Қайроқи труба трассасини реконструкция қилиш натижасида 420 гектар майдон, 4 та фермер хўжалиги ва 1 та МФЙ ҳудудидаги 250 та аҳоли томорқасининг сув таъминоти яхшиланади. Бу орқали йилига ўртача 0,4 млн куб метр сув йўқотилишининг олди олинади.
Йиғилишда мазкур лойиҳаларни ўз вақтида ва сифатли амалга ошириш, сув ресурсларидан самарали фойдаланиш ҳамда аҳоли ва фермер хўжаликлари манфаатларини таъминлаш юзасидан тегишли таклиф ва тавсиялар билдирилди.