Урганч шаҳрида «Сунъий интеллект асосида бошқарилувчи ҳокимлик» ҳамда «Урганч шаҳрида ақлли ва рақамли жамоат хавфсизлигини таъминлаш тизими» мавзуларига бағишланган республика ўқув-семинари бўлиб ўтмоқда.

Мазкур тадбир доирасида халқ депутатлари Урганч шаҳар Кенгаши депутати П.Рўзибоев томонидан республика даражасидаги раҳбарлар, соҳавий идоралар ва мутасаддиларга Урганч шаҳрида сунъий интеллект ва рақамли технологиялар асосида жамоат хавфсизлигини таъминлаш бўйича амалга оширилаётган ишлар ҳақида маъруза қилинди.

Маърузадан таъкидланишича, ўқув-семинар Ўзбекистон Республикаси Президентининг 2025 йил 1–2 май кунлари Хоразм вилоятига ташрифи давомида берилган топшириқлар ижросини таъминлаш мақсадида ташкил этилган бўлиб, унда ҳудудларда рақамли бошқарув ва хавфсизлик тизимларини жорий этишнинг амалий натижалари муҳокама қилинмоқда.

Халқ депутатлари Урганч шаҳар Кенгаши депутати П.Рўзибоев ўз маърузасида бугунги кунда Урганч шаҳрида Президентимиз ташаббуси асосида 18 та янги ва 362 та ташқи ахборот модулларини қамраб олган «Урганч – ақлли шаҳар» ахборот тизими жорий этилгани, мазкур тизим шаҳарни бошқаришда тезкор, аниқ ва шаффоф қарорлар қабул қилиш имконини яратаётгани алоҳида қайд этди.

Шунингдек, маъруза давомида сунъий интеллект асосида жамоат хавфсизлигини таъминлаш, профилактика ишларини кучайтириш, инсон омилини камайтириш ҳамда рақамли мониторинг орқали шаҳар инфратузилмасини самарали бошқариш масалалари юзасидан аниқ таклиф ва тавсиялар билдирилди.

Ўқув-семинарда республика раҳбарлари, давлат бошқаруви органлари, ҳуқуқни муҳофаза қилувчи идоралар ҳамда рақамли технологиялар ва сунъий интеллект соҳаси мутахассислари иштирок этмоқда. Тадбир келгусида ҳудудларда рақамли жамоат хавфсизлиги тизимларини янада кенг жорий этиш учун муҳим амалий майдон сифатида баҳоланди.