Xalq deputatlari Quvasoy shahar Kengashining 2026-yil 26-fevraldagi VII-15-9-11-167-K/26-son qarori bilan belgilangan vazifalar ijrosi yuzasidan bugungi kunga qadar amaliy natija ko‘zga tashlanmayapti.
Mazkur qarorga muvofiq:
Guliston MFY elektr ta'minotini yaxshilash uchun:
1 dona GKTP-250/6-0,4 kV transformator;
10 dona temir-beton tayanch ustuni;
500 metr SIP-2 (3×70 mm) kabeli;
800 metr AS-35 mm simi
ajratilishi belgilangan bo‘lib, buning uchun 157,5 million so‘m mablag‘ yo‘naltirilgan.
Shuningdek,
Do‘stlik MFY uchun:
1 dona KTPS-160/6-0,4 kV transformator;
8 dona temir-beton tayanch ustuni
o‘rnatilishi hamda 72,5 million so‘m mablag‘ ajratilgan.
Qarorda ushbu ishlarni bir oy muddatda amalga oshirish belgilangan bo‘lsa-da, oradan bir necha oy o‘tganiga qaramay, fuqarolar hali ham kutilgan natijani ko‘rmayapti.
Eng achinarlisi, davlat tomonidan ajratilgan mablag‘ evaziga xarid qilingan transformatorlar, tayanch ustunlari va elektr tarmoqlari uchun mo‘ljallangan jihozlar amaliyotga joriy etilish o‘rniga, foydalanilmay qolmoqda. Ayrim joylarda esa bu materiallar uzoq vaqt davomida ochiq maydonda saqlanib, ustini o‘t bosgan holatga kelgani davlat mulkiga nisbatan mas'uliyatsiz munosabat emasmi, degan haqli savollarni tug‘dirmoqda.
Davlat mablag‘i — xalq mablag‘i. U har bir so‘mi bilan fuqarolarning hayot sifatini yaxshilashga xizmat qilishi kerak. Uni foydalanmasdan yerda qoldirish yoki ijroni asossiz cho‘zish nafaqat iqtisodiy samarasizlik, balki davlat ishonchiga putur yetkazuvchi holat hisoblanadi.
Bugun Prezidentimiz tomonidan "xalq davlat idoralariga emas, davlat idoralari xalqqa xizmat qilishi kerak" degan tamoyil ilgari surilgan bir vaqtda, Kengash qarorlarining o‘z vaqtida va sifatli bajarilishi har bir mas'ul tashkilotning ustuvor vazifasi bo‘lishi shart.
Quvasoy shahar elektr tarmoqlari korxonasi mazkur masala yuzasidan:
qaror ijrosi nega kechikayotgani;
ajratilgan uskunalar va mablag‘larning bugungi holati;
ishlarning aniq qachon yakunlanishi
bo‘yicha Kengashga, jamoatchilikka ochiq va asosli xisobot berishi maqsadga muvofiq.
Shu bilan birga shahar Kengashining Tegishli doimiy komissiya majlisi va Navbatdagi sessiyasida holat yuzasidan hisoboti tinglanadi.
Kengash qarori qog‘ozda qolmasligi, ajratilgan davlat mablag‘lari esa amaliy natijaga aylanishi zarur. Zero, Prezidentimiz olib borayotgan islohotlarning haqiqiy samarasi aynan joylardagi mas'uliyat, intizom va ijro bilan belgilanadi.