Xalq deputatlari Qashqadaryo viloyati Kengashi deputati Salomat Kamilova tomonidan Qarshi shahrida jamoat transporti infratuzilmasini yanada takomillashtirish hamda aholiga qulay sharoit yaratish maqsadida Viloyat hokimining o'rinbosari Murodulla Azizovga deputat so‘rovi yuborildi.

Deputat so‘rovida O‘zbekiston Respublikasi Vazirlar Mahkamasining 2024-yil 14-noyabrdagi 757-sonli "Hududlarda jamoat transporti infratuzilmasini rivojlantirishga doir qo‘shimcha chora-tadbirlar to‘g‘risida"gi qarori ijrosiga alohida e'tibor qaratilgan. Mazkur qarorga muvofiq, shaharlar va aholi punktlari ko‘chalaridagi avtobus bekatlarini tashkil etish viloyat hokimliklari zimmasiga yuklatilgan.

O‘rganishlar davomida Qarshi shahridagi viloyat "Ona va bola" shifoxonasi oldida avtobus bekati mavjud emasligi, shuningdek, 7 va 16-sonli avtobus yo‘nalishlarida ham qo‘shimcha bekatlarga ehtiyoj borligi aniqlangan. Ushbu holat fuqarolar, ayniqsa bemorlar, homilador ayollar, yosh bolali onalar hamda keksalar uchun noqulaylik tug‘dirmoqda.

Shu munosabat bilan deputat tomonidan mas'ul idoralarga mazkur hududlarda avtobus bekatlarini barpo etish bo‘yicha ko‘rilayotgan choralar hamda rejalashtirilgan ishlar yuzasidan qonunchilikda belgilangan muddatlarda asoslantirilgan axborot taqdim etish so‘raldi.

Qonun ustuvorligi va hukumat qarorlari ijrosini ta'minlash — fuqarolarga qulay va xavfsiz transport xizmatlarini yaratishning muhim omilidir.