Deputatlar tomonidan Quva tumani markaziy shifoxonasidagi ta’mirlash ishlari o‘rganildi 

Quva tumanida aholi salomatligini mustahkamlash va tibbiy xizmat sifatini oshirish maqsadida amalga oshirilayotgan
qurilish-ta’mirlash ishlari deputatlarning doimiy e’tiboridadir. 

Xalq deputatlari Quva tuman Kengashi deputatlari tomonidan Taxtako‘prik mahalla fuqarolar yig‘ini hududida joylashgan
Quva tumanlararo qo‘shma shikastlanish va o‘tkir qon-tomir kasalliklari markazida
“Tashabbusli byudjet” loyihasi doirasida amalga oshirilayotgan ishlar holati o‘rganildi. 

Ma’lumki, mazkur loyiha uchun davlat tomonidan 1,5 milliard so‘m mablag‘ ajratilgan bo‘lib,
ta’mirlash ishlari pudratchi tashkilot - “Ulug‘bek qizil Qaqir” MChJ tomonidan olib
borilmoqda. 

Deputatlarning o‘rganishlari jarayonida: 

kasalxonaning tibbiy xizmat ko‘rsatish xonalari va bemorlar palatalarida bajarilgan pardozlash
ishlarida ayrim kamchiliklar va nuqsonlar aniqlandi; 

aniqlangan kamchiliklar yuzasidan pudratchi tashkilot rahbariyatiga anik ko‘rsatmalar berildi
hamda ularni bartaraf etish muddatlari belgilab qo‘yildi; 

ishlar sifatini oshirish, zamonaviy talablarga mos ravishda bajarish bo‘yicha qo‘shimcha tavsiyalar berildi. 

Shu bilan birga, deputatlar ta’mirlash jarayonida shaffoflik, sifat va tezkorlik ta’minlanishi shart ekanligini ta’kidlab,
bu masala qat’iy deputatlik nazoratiga olindi. 

Mazkur chora-tadbirlar tufayli shifoxonada bemorlar uchun qulay, tibbiy xizmat ko‘rsatish sifatini oshirishga xizmat
qiladigan zamonaviy sharoit yaratilishi ko‘zda tutilmoqda.