Deputat aholi muammolarini o‘rganmoqda

Payariq tumanida xalq vakillari tomonidan aholi murojaatlarini o‘rganish, ularning muammolariga yechim topish ishlari izchil davom etmoqda. Viloyat Kengashi deputati Zebiniso Yusupova "Do‘stlik" mahallasida bo‘lib, fuqarolar bilan ochiq muloqot qildi, muammo va takliflarni tingladi.

Mahallada 1049 ta xonadonda 5491 nafar aholi istiqomat qiladi. Shundan 114 nafar ayol “Ayollar daftari”ga kiritilgan. Ular orasida Mamadaliyeva Manzura jigar sirroziga chalingani sabab yotoqda yotib qolgan, doimiy yordamga muhtoj. 

Deputat mazkur holatni o‘rganib, tegishli tashkilotlar bilan hamkorlikda zarur yordam ko‘rsatish bo‘yicha choralar belgiladi.

Mahallada 3 ta maktab va 4 ta uy bog‘chasi faoliyat ko‘rsatmoqda. Yangi davlat bog‘chasi esa sentyabr oyida foydalanishga topshirilishi lozim edi. Biroq qurilish ishlari to‘liq yakunlanmagan. Bu boradagi ishlar xam deputat nazoratiga olindi.

Temirov Jaxongirning 2018 yilda tug‘ilgan farzandi nogironligi sabab uy sharoitida ta’lim olishi zarur. Uning masalasi ham deputat tomonidan o‘rganildi. Zebiniso Yusupova bu borada tuman maktab va maktabgacha ta’lim bo‘limi bilan uchrashib, J.Temirovning farzandi ta’lim olishi uchun amaliy yordam ko‘rsatilishini ma’lum qildi.

Deputatning ta’kidlashicha, aholining har bir murojaati muhim ahamiyatga ega. "Do‘stlik" mahallasida ijtimoiy yordamga muhtoj aholini qo‘llab-quvvatlash, nogironligi bo‘lgan bolalar ta’limi va bog‘chalar faoliyatini yo‘lga qo‘yish bo‘yicha ishlarni jadallashtirish zarur.

Deputat Zebiniso Yusupova tashabbusi bilan aholi muammolari joyida o‘rganilib, ularga aniq yechim topish choralari ko‘rilmoqda. Bu esa davlat va xalq vakillari o‘rtasidagi hamkorlik samarasi, islohotlar hayotga tatbiq etilayotganining yaqqol ifodasi bo‘lmoqda.

⚡️ @sam_vil_deputatlari