Xalq deputatlari Qo‘qon shahar Kengashi deputati F.Qaxxarova tomonidan “Kalvak guzari” mahalla fuqarolar yig‘inida navbatdagi o‘rganish ishlari olib borildi.

O‘rganish davomida ko‘cha boshi Tolipov Fozilxon bilan suhbatlashilib, mahalla hududidagi ichki ko‘chalarda sanitariya va obodonlashtirish holati yuzasidan fuqarolarning murojaatlari tinglandi.

Xususan, Turkiston ko‘chasi 158-A, Yassaviy ko‘chasi 1-A va 2-A ko‘p qavatli uylar oldida joylashgan chiqindi to‘plash hududlaridagi holat ko‘zdan kechirildi.

Ma’lum bo‘lishicha, mazkur hududlarda chiqindilarni olib chiqish bo‘yicha “Toza hudud” unitar korxonasi hamda mahalla fuqarolar yig‘ini o‘rtasida tegishli shartnoma mavjud bo‘lishiga qaramay, chiqindilar o‘z vaqtida olib chiqilmayotgani aholining haqli e’tirozlariga sabab bo‘lmoqda.

Mazkur masala joyiga chiqqan holda o‘rganilib, chiqindilarni o‘z vaqtida olib chiqish va hududning sanitariya holatini yaxshilash zarurligi qayd etildi.

Holat deputat F.Qaxxarova nazoratiga olinib, tegishli tashkilotlar bilan hamkorlikda muammoni tezkor bartaraf etish hamda hududda tozalik va obodonlashtirish ishlarini yaxshilash bo‘yicha kelishib olindi.

Xalq deputatlari Qo‘qon shahar Kengashi