Surxondaryo viloyati Ichki ishlar boshqarmasida “Zamonaviy davlat xizmatchisi: shaxsiy mas’uliyat, tashabbuskorlik va natijadorlik” mavzusida yig‘ilish bo‘lib o‘tdi.

Unda Xalq deputatlari Termiz shahar Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi a’zosi A.Karimov ishtirok etdi.
Yig‘ilish davomida O‘zbekiston Respublikasi Ichki ishlar vazirligi tomonidan qabul qilingan yangi buyruq va ko‘rsatmalarning mazmun-mohiyati shaxsiy tarkibga yetkazilib, davlat xizmatchisining kasbiy mas’uliyati, xizmat intizomi va faoliyat samaradorligini oshirish masalalariga alohida e’tibor qaratildi.

Shuningdek, xizmat vazifalarini vijdonan va sidqidildan bajarish, fuqarolar bilan muloqotda xushmuomala hamda xolis bo‘lish, qonuniylik va adolat tamoyillariga qat’iy rioya etish, korrupsiyaviy holatlarning oldini olish yuzasidan fikr-mulohazalar bildirildi.

Ta’kidlanganidek, ichki ishlar organlari xodimlarining faoliyatida shaxsiy mas’uliyat, halollik, tashabbuskorlik va natijadorlik muhim o‘rin tutadi. Har bir xodim fuqarolarning huquq va erkinliklarini himoya qilish, qonun ustuvorligini ta’minlash hamda aholining davlat organlariga bo‘lgan ishonchini mustahkamlashni o‘z faoliyatining ustuvor vazifasi deb bilishi lozim.

Yig‘ilish yakunida korrupsiyaga qarshi kurashish, xizmat intizomini mustahkamlash va fuqarolar oldidagi mas’uliyatni yanada oshirish borasida belgilangan vazifalarni izchil amalga oshirish muhimligi qayd etildi.