🔹Xalq deputatlari Marg‘ilon shahar Kengashi deputati M.Mirzayev tomonidan Kengashning 2026-yil 7-fevraldagi VII-19-9-11-168-K/26-son qarori bilan tasdiqlangan, 2026-yilda Marg‘ilon shahrini ijtimoiy-iqtisodiy rivojlantirishga qaratilgan loyihalarning manzilli ro‘yxati asosida hududlarda o‘rganish ishlari olib borildi.

O‘rganishlar davomida bir qator loyihalarning bugungi holati, yaratilgan ish o‘rinlari hamda ularni amalga oshirish jarayonidagi muammolar tahlil qilindi.

🔹Xususan, “Luntik” xususiy maktabgacha ta’lim muassasasi faoliyati ko‘zdan kechirildi. Mazkur loyiha doirasida 4 ta ish o‘rni yaratilgan bo‘lib, ajratilgan kredit mablag‘lari to‘liq yopilgan. Loyiha amalda mavjud bo‘lsa-da, muassasani yanada rivojlantirish va ta’mirlash ishlarini yakunlash uchun qo‘shimcha mablag‘ zarurligi qayd etildi. Muassasa rahbari U.Madrahimova tomonidan mavjud ehtiyojlar yuzasidan takliflar bildirildi.

Shuningdek, Yayilma MFY hududida joylashgan savdo do‘koni faoliyati ham o‘rganildi. Mazkur loyiha asosida 2 ta ish o‘rni yaratilgan bo‘lib, tadbirkor tomonidan loyiha mavjudligi, biroq kredit mablag‘lari jalb etilmaganligi ma’lum qilindi.

Bundan tashqari, M. Yusupov rahbarligidagi “Nur” kafesi faoliyati ham ko‘zdan kechirildi. Ushbu loyiha doirasida 10 ta yangi ish o‘rni yaratilgan bo‘lib, aholi bandligini ta’minlashda muhim ahamiyat kasb etmoqda.

🔹O‘rganishlar yakunida aniqlangan muammolarni bartaraf etish, loyihalarni qo‘llab-quvvatlash hamda tadbirkorlar faoliyatini yanada rivojlantirish yuzasidan tegishli tavsiyalar berildi.