Davlatimiz rahbarining Farmoni (PF-98-son, 23.06.2025 y.) bilan O‘zbekistonda mahalliy davlat hokimiyati vakillik organlari faoliyatini 2030 yilgacha rivojlantirish Konsepsiyasi tasdiqlandi.

Unda mahalliy Kengashlar faoliyatini yangi bosqichga olib chiqishni nazarda tutuvchi muhim vazifalar belgilab berildi.

Farmonda jamiyat va davlat hayotining muhim masalalarini hal etishda mahalliy davlat hokimiyati vakillik organlarining rolini oshirish, fuqarolarning mahalliy boshqaruvda keng ishtirok etishiga oid demokratlashtirish jarayonlarini mustahkamlash, hududiy boshqaruvni “aholi manfaatlariga xizmat qilish” tamoyili asosida nomarkazlashtirish, mahalliy davlat hokimiyati vakillik organlari xalqaro hamkorligining huquqiy asoslarini mustahkamlash kabi maqsadlar ko‘zda tutilgan.

Farmon bilan ijro hokimiyati organlariga tegishli bo‘lgan 4 ta vakolat mahalliy Kengashlarga o‘tkazilmoqda.

Xususan, majburiy to‘lov va mahalliy yig‘imlar miqdorini belgilashga oid ayrim turdagi bir martalik yig‘imlar, ijara to‘lovi va ko‘rsatiladigan xizmatlar qiymatini belgilash, ijtimoiy himoyaga muhtoj shaxslar uchun ish o‘rinlarini zaxiralash kabi masalalar shular jumlasidandir.

Mazkur Farmonga ko‘ra:

✅Mahalliy Kengashlarning nazorat hamda norma ijodkorligi bo‘yicha faoliyati kuchaytiriladi, jumladan ijroiya hokimiyati organlari rahbarlarining ayrim ijtimoiy masalalar yuzasidan axborotini eshitish bo‘yicha “Kengash soati” instituti joriy etiladi;

✅Fuqarolar tomonidan mahalliy Kengashlarga elektron jamoaviy murojaat qilish bo‘yicha yangicha tizim yaratiladi, ularning sessiya ishini bevosita kuzatish tizimi yo‘lga qo‘yiladi;

✅Kengashlar tomonidan qarorlar qabul qilishda fuqarolik jamiyati, yoshlar hamda ilmiy doiralar vakillarining ishtiroki ta’minlanadi;

✅Mahalliy Kengashlar tomonidan hududga oid muammoli masalalarni hal etish bo‘yicha imkoniyatlar kengaytiriladi, xususan, mahalliy byudjetni, hududlarni rivojlantirish dasturlarini shakllantirishda deputat va “mahalla yettiligi”ning ishtirokini ta’minlash tizimi joriy etiladi;

✅Mahalliy Kengash faoliyatini raqamlash ishlari izchil davom ettiriladi, xususan, Kengash qarori loyihalarini tayyorlash va huquqiy ekspertizadan o‘tkazishga sun’iy intellekt texnologiyalari joriy etiladi.