2025-yil 10–11-iyun kunlari poytaxtimiz Toshkent shahrida IV-Toshkent xalqaro investitsiya forumi bo‘lib o‘tdi. Mazkur forum o‘zining ko‘lami, ishtirokchilar soni va imzolangan shartnomalar hajmi bilan nafaqat O‘zbekiston, balki butun mintaqa investitsion muhitining jadal rivojlanayotganini namoyon etdi.

Dunyoning 84 davlatidan 2 500 dan ortiq investor, ishbilarmonlar va xalqaro tashkilotlar vakillari ushbu forumda qatnashib, mamlakatimizning iqtisodiy salohiyatiga yuksak baho berdilar. Forum davomida umumiy qiymati 17 milliard AQSh dollariga teng bo‘lgan kelishuvlar imzolandi. Bu esa O‘zbekistonning global sarmoyadorlar uchun ishonchli va istiqbolli hamkor ekanini yana bir bor tasdiqladi.

Forum doirasida muhim yo‘nalishlar bo‘yicha bir qator strategik tashabbuslar ilgari surildi. Jumladan, yashil iqtisodiyot, qayta tiklanuvchi energiya manbalari, raqamli infratuzilma, sanoat tarmoqlari, sog‘liqni saqlash va ta’lim sohalariga oid loyihalar alohida e’tibor markazida bo‘ldi. Mamlakatimizda 2025-yildan boshlab 2 000 megavattdan ortiq quyosh va shamol elektr stansiyalarining qurilishi rejalashtirilgan bo‘lib, bu kelajakda energiya mustaqilligini ta’minlashda muhim o‘rin tutadi.

Forumning yana bir diqqatga sazovor jihati — inson kapitaliga qaratilgan e’tibor bo‘ldi. Yangi O‘zbekiston Taraqqiyot strategiyasi doirasida ta’lim sifati, sog‘liqni saqlash tizimi va mehnat bozorini modernizatsiya qilishga oid reja va dasturlar xalqaro hamjamiyatga taqdim etildi.

Shu bilan birga, forum doirasida o‘tkazilgan yalpi majlislar, panel muhokamalar va B2B uchrashuvlar ishtirokchilarga bevosita aloqalar o‘rnatish va hamkorlikni chuqurlashtirish imkonini berdi. Dastur-xususiy sheriklik asosida amalga oshiriladigan loyihalar, ayniqsa, transport, kommunal xizmatlar, qishloq xo‘jaligi va sog‘liqni saqlash tarmoqlarini rivojlantirishda muhim ahamiyat kasb etadi.

Xulosa o‘rnida aytish mumkinki, IV-Toshkent xalqaro investitsiya forumi O‘zbekiston iqtisodiy taraqqiyotining navbatdagi bosqichini boshlab berdi. Forumda erishilgan natijalar mamlakatimizda barqaror, ochiq va zamonaviy iqtisodiy muhit shakllanayotganini, global biznes hamjamiyati esa ushbu o‘zgarishlarni faol qo‘llab-quvvatlayotganini anglatadi. Bu kabi yirik xalqaro tadbirlar orqali O‘zbekiston kelajakda nafaqat mintaqaviy, balki global iqtisodiy markazlardan biriga aylanishi shubhasiz.

B.Xamrayev

Xalq deputatlari Toyloq tumani Kengashi kotibiyati mudiri