Zamonaviy globallashuv davrida har bir xalqning o‘ziga xos madaniyati, qadriyatlari va mahsulotlari orqali tanilishi va e’tirof etilishi aynan milliy brendlar orqali ro‘yobga chiqmoqda. Milliy brend – bu faqatgina mahsulot yoki xizmat emas, bu – millatning tarixi, ma’naviyati, madaniy yutuqlari va o‘zligining timsolidir. Uni qo‘llab-quvvatlash esa nafaqat iqtisodiy, balki ijtimoiy va madaniy taraqqiyotning muhim omilidir.

Avvalo, milliy brend mahalliy ishlab chiqaruvchilar mehnatini qadrlash, ichki bozorni mustahkamlash va milliy iqtisodiyotga ijobiy ta’sir ko‘rsatadi. Mahsulotlarimizning sifati oshib, raqobatbardoshligi kuchaysa, ular nafaqat ichki bozorga, balki tashqi bozorlarga ham yo‘l oladi. Bu esa o‘z navbatida yangi ish o‘rinlarini yaratadi, eksport hajmi ortadi va mamlakat iqtisodiy barqarorligiga xizmat qiladi.

Bundan tashqari, milliy brendni targ‘ib qilish yosh avlodda vatanparvarlik tuyg‘usini kuchaytiradi. O‘z yurtida ishlab chiqarilgan mahsulotlardan faxrlanish, uni boshqalarga tavsiya qilish orqali har bir fuqaro milliy qadriyatlarni himoya qiladi va uni rivojlantiradi. Shu tariqa, jamiyatda “Men o‘z yurtimni sevaman” degan ichki ishonch uyg‘onadi.

Bugungi kunda O‘zbekistonda “Made in Uzbekistan” tamg‘asini dunyoga tanitish bo‘yicha ko‘plab islohotlar olib borilmoqda. Kichik biznes va xususiy tadbirkorlikni qo‘llab-quvvatlash, milliy mahsulotlarni ko‘rgazmalarda targ‘ib qilish, “Halol” sertifikati kabi xalqaro andozalarga moslashtirish ishlari milliy brendlarimizning nufuzi va ishonchliligini oshirishda muhim ahamiyatga ega.

Ammo milliy brendlar faqat davlat siyosatiga tayanib qolmasligi lozim. Har bir fuqaro, har bir iste’molchi ongli ravishda mahalliy mahsulotlarni tanlashi, ularni ijtimoiy tarmoqlarda targ‘ib qilishi va yaxshi fikrlar bilan baham ko‘rishi ham muhim. Aynan ijtimoiy birdamlik orqali milliy brend global bozorga chiqa oladi.

Xulosa qilib aytganda, milliy brendni qo‘llab-quvvatlash – bu Vatan ravnaqi yo‘lida qo‘yilgan harakatdir. Har birimiz ichki iste’mol madaniyatini oshirsak, mahalliy mahsulotlarga ishonch bildirsak, o‘z navbatida, jamiyatimizning iqtisodiy, ijtimoiy va madaniy taraqqiyotiga hissamizni qo‘shgan bo‘lamiz.

Xalq deputatlari tuman Kengashi deputati: N Parmanova.