Bugun Xalq deputatlari Dehqonobod tumani Kengashining VII-chaqiriq 10-sessiyasi bo‘lib o‘tdi. Sessiyada tuman ijtimoiy-iqtisodiy hayotiga oid qator muhim masalalar ko‘rib chiqildi.

Sessiya kun tartibida, avvalo, O‘zbekiston Respublikasi Prezidentining Qashqadaryo viloyatini 2024–2025-yillarda kompleks rivojlantirishga oid qarorlarining Dehqonobod tumanida ijro etilishi yuzasidan tuman hokimi Sh. Shokirov tomonidan batafsil axborot berildi. Unda amalga oshirilayotgan islohotlar, investitsiya loyihalari va ijtimoiy sohalardagi o‘zgarishlar haqida ma’lumotlar taqdim etildi.

Shuningdek, Dehqonobod tumanining ma’muriy-hududiy chegaralarini aniqlash bo‘yicha olib borilgan ishlarning yakuniy natijalari muhokama qilinib, tegishli qarorga o‘zgartish va qo‘shimchalar kiritish masalasi ko‘rib chiqildi. Bu borada Davlat kadastrlari palatasi tuman bo‘limi rahbari A. Laliyev hisoboti tinglandi.

Sessiya davomida yana bir muhim masala — tuman davlat sanitariya-epidemiologik osoyishtalik markazi tomonidan 2025-yil davomida amalga oshirilgan ishlar yuzasidan rahbar A. Qulboevning hisoboti eshitildi. U hududdagi sanitariya holati, epidemiyalarning oldini olish bo‘yicha amalga oshirilgan chora-tadbirlar haqida so‘z yuritdi.

Yakunda boshqa dolzarb masalalar ham muhokama qilinib, tegishli qarorlar qabul qilindi.