Tashrif davomida deputat tibbiyot muassasasida yaratilgan shart-sharoitlar, dori vositalarining mavjudligi, ularning saqlanishi hamda aholiga yetkazib berish tartibi bilan yaqindan tanishdi. Shuningdek, mas’ul xodimlar bilan suhbat o‘tkazilib, mavjud muammolar va ularning yechimlari muhokama qilindi.

O‘rganish jarayonida O‘zbekiston Respublikasi Vazirlar Mahkamasining 2025-yil 19-iyundagi 382-sonli “Birlamchi tibbiy-sanitariya yordami muassasalarida O‘zbekiston Respublikasi Davlat budjeti hisobidan qoplanadigan tibbiy yordamning kafolatlangan hajmlarini tasdiqlash to‘g‘risida”gi qaroriga asosan, birlamchi tibbiy-sanitariya muassasalarida 76 turdagi dori-darmon va 35 turdagi tibbiy buyumlar bepul ajratilishi belgilanganligi ma’lum qilindi.

Mazkur qarorga muvofiq, “Shayxlar” mahallasidagi 6 935 nafar aholi bepul dori-darmon hamda tibbiy vositalar bilan ta’minlanmoqda. Bu esa aholining sog‘lig‘ini mustahkamlash, ijtimoiy himoyani kuchaytirish hamda tibbiy xizmatlar sifati va qamrovini oshirishga xizmat qilmoqda.

Deputat tomonidan kelgusida ham tibbiyot muassasalari faoliyati ustidan jamoatchilik nazoratini kuchaytirish, aholining murojaatlarini o‘rganish va mavjud kamchiliklarni bartaraf etish bo‘yicha tegishli taklif hamda tavsiyalar ishlab chiqilishi ta’kidlandi.