Yoyilma mahallasidagi «O‘r Ariq» ko‘chasi aholisi ichimlik suvi muammosi yuzasidan deputatga murojaat qildi

O‘zbekiston Respublikasi Prezidentining PQ-406-son Qarori, Oliy Majlis Senati Kengashining KQ-35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan tavsiyalar ijrosi doirasida Xalq deputatlari Marg‘ilon shahar Kengashida deputatlik o‘rganishlari izchil davom ettirilmoqda.

Navbatdagi fuqarolar bilan uchrashuv chog‘ida Marg‘ilon shahar «Yoyilma» mahallasi hududidagi O‘r Ariq ko‘chasida istiqomat qiluvchi aholi ko‘chaning markazlashgan ichimlik suvi tarmog‘i bilan ta’minlanmaganligi yuzasidan muammoni ko‘tarib chiqdi. Fuqarolarning bildirishicha, ko‘chaga hozirgacha markazlashgan suv tarmog‘i tortilmagan bo‘lib, qo‘shni xonadonlar suvni faqat o‘z imkoniyatlaridan kelib chiqqan holda alohida-alohida tortib olgan. Bu esa aholining yagona va barqaror ichimlik suvi bilan ta’minlanishi masalasini to‘liq hal etmagan.

Muammoning dolzarbligini inobatga olib, deputat X.Abdurahmonov «Xalq deputatlari viloyat, tuman va shahar Kengashi deputatining maqomi to‘g‘risida»gi Qonunning 5 va 8-moddalariga asosan Marg‘ilon shahar hokimining qurilish, to‘siqlarsiz muhit yaratish, kommunikatsiyalar, kommunal xo‘jaligi, ekologiya va ko‘kalamzorlashtirish masalalari bo‘yicha o‘rinbosariga rasmiy deputat so‘rovi yuborildi.

So‘rovda O‘r Ariq ko‘chasiga taxminan 600 metr uzunlikdagi ichimlik suvi tarmog‘ini tortish imkoniyatini mas’ul mutasaddilar ishtirokida bevosita joyiga chiqqan holda o‘rganish, ko‘chadagi mavjud suv ta’minoti holatini texnik jihatdan baholash hamda aholini barqaror ichimlik suvi bilan ta’minlash bo‘yicha aniq chora-tadbirlarni belgilash so‘ralgan.

Deputatlik nazorati doirasidagi ushbu murojaat aholining kundalik ehtiyoji bo‘lgan ichimlik suvi ta’minoti masalasini hal etish, ko‘cha infratuzilmasini yaxshilash va fuqarolarning munosib turmush sharoitlarini ta’minlashga qaratilgani bilan ahamiyatlidir.