Aholini sifatli, barqaror va xavfsiz elektr energiyasi bilan ta’minlash — hududlarda doimiy e’tibor talab qiladigan masalalardan biridir.

Shu maqsadda “12-Saxovat” saylov okrugida o‘tkazilgan nazorat-tahlil tadbiri davomida “Saxovat” mahallasining Diyor va Iftixor ko‘chalaridagi elektr simyog‘ochlari holati ko‘zdan kechirildi.

O‘rganish jarayonida ayrim elektr simyog‘ochlarining eskirgani va o‘z xizmat muddatini o‘tab bo‘lgani aniqlandi. Bunday holat nafaqat elektr ta’minotida uzilishlar yuzaga kelishiga, balki aholi va ularning mol-mulki xavfsizligiga ham xavf tug‘dirishi mumkin.

Aniqlangan muammoni bartaraf etish maqsadida 12-"Saxovat" saylov okrugi deputati X.Jurayev tomonidan Termiz shahar elektr ta’minoti korxonasi boshlig‘i Sh.Ochilovga deputat so‘rovi yuborildi.

So‘rovda:

eskirgan elektr simyog‘ochlarini bosqichma-bosqich zamonaviy beton ustunlarga almashtirish;

elektr uzatish tarmoqlarining texnik holatini qayta ko‘rib chiqish;

aholi xavfsizligi hamda sifatli va uzluksiz elektr ta’minotini ta’minlash;

amalga oshirilgan ishlar va ko‘rilgan choralar yuzasidan belgilangan tartibda yozma ma’lumot taqdim etish so‘raldi.

Mazkur masala deputatlik nazoratida bo‘lib, aniqlangan kamchiliklarning amaliy yechimi va fuqarolar manfaatlarini ta’minlash bo‘yicha ishlar davom ettiriladi.

Aholi murojaati — e’tiborda, muammo yechimi — nazoratda!