Xalıq deputatları Bozataw rayonlıq Keńesi 4-sanlı "Tórtkúl" saylaw okruginen saylanǵan deputat A.Jangabaeva tárepinen Qusxanataw APJ aymaǵındaǵı puqaralardan kelip túsken múrájatlar tiykarında ornında úyreniw jumısları alıp barıldı.
Úyreniwler dawamında 95V059D avtomobil jolınıń 1,1-kilometrinde jaylasqan Erkin kópiri kózden ótkerildi. Házirgi kúnde kópirdegi jaǵdaydıń qanaatlandırarsız ekenligi, ayırım bólimleriniń jaramsız awhalda bolǵanlıǵı hám bul jaǵday jol qatnawı ushın bir qatar qolaysızlıqlar tuwdırıp atırǵanı anıqlandı.
Aytıwınsha, bul jol hám kópirden kúndelikli túrde awıl puqaraları, aydawshılar hám túrli transport quralları paydalanadı. Sonlıqtan kópirdegi kemshiliklerdiń waqtında saplastırılmawı jol qatnawında qıyınshılıqlar keltirip shıǵarıwı, ásirese qolaysız hawa-rayı sharayatlarında transport hám piyada qatnawshıları ushın qáwipli jaǵdaylardıń júzege keliwine sebep bolıwı múmkin.
Deputat A.Jangabaeva úyreniw barısında kópirden paydalanıwshılardıń pikirleri menen tanısıp, bul másele puqaralar ushın áhmiyetli ekenligin atap ótti. Sonday-aq, kópirdegi kemshiliklerdi saplastırıw, onı texnikalıq jaqtan tekseriwden ótkeriw hám zárúr bolsa qayta tiklew yamasa ońlaw jumısların alıp barıw boyınsha tiyisli shólkemler menen birgelikte ilajlar kóriw kerek ekenligi belgilendi.
Jol hám kópir infrastrukturası - aymaqtaǵı sociallıq-ekonomikalıq rawajlanıwdıń áhmiyetli bólegi. Sebebi sapalı hám qáwipsiz jol qatnawı puqaralardıń erkin háreketleniwi, awıl xojalıǵı ónimlerin tasıw, tez járdem, óndiris hám basqa da xızmetlerdiń úzliksiz islewi ushın úlken áhmiyetke iye.
Sol sebepli puqaralardıń kótergen máselelerin ornında úyreniw, anıq jaǵdaydı baqlaw hám tiyisli shólkemler aldında másele qoyıw deputatlıq jumıstıń áhmiyetli baǵdarlarınan biri bolıp esaplanadı.
Úyreniw nátiyjeleri boyınsha Erkin kópiri boyınsha tiyisli ilajlar kóriw hám máselelerdiń sheshimin támiyinlew boyınsha usınıslar berildi. Másele deputat qadaǵalawında bolıp, aldaǵı waqıtta orınlanǵan jumıslardıń nátiyjeleri de úyrenip barıladı.