Perzentlerimizdiń keleshegi tek ǵana bilimlendiriw hám muǵallimge baylanıslı

Usı jıldıń 9-sentyabr kuni Prezidentimiz basshılıǵında bilimlendiriw tarawındaǵı reformalardıń orınlanıwı hám aldaǵı wazıypalarǵa baǵıshlanǵan videoselektor májilisi bolıp ótken edi. Onda dáslep jurtbasshımız elimiz ekonomikasınıń rawajlanıwı, perzentlerimizdiń keleshegi tek ǵana bilimlendiriw hám muǵallimge baylanıslı ekenligin aytıp, sońǵı jıllarda mámleketimizde tarawǵa itibar hám onıń nátiyjesin - muǵallimge múnásip sharayat jaratıw, baqsha, mektep qurıw, kerekli úskeneler menen támiyinlew, shetten jetik kadrlar alıp keliw, zamanagóy sabaqlıq hám oqıw baǵdarlamaların engiziw boyınsha júdá kóplegen sharayatlar jaratılǵanı hám bul jáne de dawam ettiriletuǵınlıǵın atap ótti. Májiliste kiritilip atırǵan investiciyalarǵa, jańadan ashılıp atırǵan kárxanalarǵa jarasa múnásip kadrlar da tayarlanıwı zárúrligi ayrıqsha atap ótildi. Ótken dáwirde muǵallimlerdiń aylıǵına qosımsha 10 nan aslam ústemeler engizildi. «- Itibar beriń, búgin óz ústinde islegen 60 mıńnan aslam oqıtıwshı 10-12 million swm aylıq almaqta. Bul qashan bolǵan?» - dedi Prezident. Usı aydan baslap mektep direktorları, baqsha basshıları hám olardıń orınbasarlarınıń aylıǵı da 10 million sumnan astı. Jańa bahalaw sistemasına ótken 1,5 mıń mekteptiń 300 aslamı unamlı nátiyje kórsetkeni ushın pútkil jámááti 40 procentke shekem ústeme alıwı belgilengen. Usı jıldıń basınan xalıqaralıq pán olimpiadalarında oqıwshılarımız 195 medaldı qolǵa kirgizdi. Olarǵa arttırılǵan stavkada jámi 10 milliard swm, trener muǵallimlerge bolsa 3,5 milliard swm aqshalay sıylıq beriledi. Shet tili iyeleri tartılǵan 1 mıńnan aslam mektepte til boyınsha sertifikat alǵan oqıwshılardıń sanı bir jılda 2,5 esege kóbeydi. Bunnan tısqarı muǵallimlerimizge jay alıw ushın beriletuǵın subsidiyalarda atap ótildi.Bul húrmetli Prezidentimizdiń muǵallimlerge degen úlken húrmeti, isenimi. Al buǵan bar intası menen juwap beriw hár bir ustazdıń wazıypası dep oylayman. Aldın paytaxtta ǵana qánigelestirilgen mekteplerde gúzetilgen pánler boyınsha xalıqaralıq sertifikatların alıp atırǵan oqıtıwshı, oqıwshılar endi biziӊ rayonımızda da bar. Bul oqıwshı menen qosa, muǵallimlerimizdiń de jemisi, pidayılıq miyneti nátiyjesi. Lekin, ayırım oqıtıwshılarımızdıń usınday jeńillikler, imkaniyatlardan utımlı paydalana almay atırǵanlıqları, elede ѳz ústinde izleniwine sebep boladı. Sonıń ushın, muǵallimlerimiz óz ústinde kóbirek izlense, oqıwshılardı joqarı klastan baslap pullı tayarlıqlarǵa (repetitorlarǵa) emes, qollarında sertifikatları bar bolıp, ózleri mektepte qosımsha tayarlasa, sonday-aq, ózleriniń sabaq ótiw is tájiriybelerin, aldınǵı pedagogikalıq usılların tek rayonda, Qaraqalpaqstan Respublikasında emes, Ózbekstan boylap en jaydırsa, balalardı óz pánine qızıqtıra alsa, Prezidentimizdiń isenimin aqlay alǵan bolamız.