Оilaviy qadriyatlarni saqlash va ijtimoiy-ma’naviy muhitni sog‘lomlashtirish bo‘yicha tumanda "Ajrim — yechim emas!" shiori ostida keng qamrovli va amaliy uchrashuv bo‘lib o‘tdi.

Tadbirda Respublika Oila va xotin-qizlar qo‘mitasi raisi o‘rinbosari Mukarram Nurmatova ishtirok etib, tumanning 1-chorak yakunlari bo‘yicha ko‘rsatkichlarini tanqidiy tahlil qildi. Yig‘ilishda davlatimiz tomonidan xotin-qizlarga berilayotgan keng imtiyozlar va yaratilgan imkoniyatlardan samarali foydalanish choralari ko‘rib chiqildi.

Uchrashuvda nafaqat soha mutasaddilari, balki xalq deputatlari tuman Kengashi a’zolari ham faol ishtirok etishdi. Deputatlar har bir mahalladagi muammoli oilalar bilan individual ishlash, ajrimlarning tub sabablarini o‘rganish va ijtimoiy ko‘mak berish masalalarida o‘z takliflarini bildirdilar.

Tadbirning eng ta’sirli qismi 18-Hazortut saylov okrugi deputati M.Jumayeva tashabbusi bilan 40 yildan buyon imkoniyati cheklangan turmush o‘rtog‘ini e’zozlab kelayotgan Hamro Karomatovaning hayot yo‘liga bag‘ishlandi.

"Turmush o‘rtog‘im avtohalokatga uchraganda yosh edim, birgina qizimiz bor edi. Lekin biror marta tashlab ketishni xayolimga keltirmadim. Bugun 5 nafar nevaraning buviman," — degan onaxonning so‘zlari zalda o‘tirgan har bir ishtirokchini mulohaza qilishga undadi.

Shunchaki nutqlar bilan cheklanib qolmasdan, olib borilgan tushuntirish ishlari va ko‘rsatilgan ibratli namunalar natijasida ajrashish arafasida bo‘lgan 7 ta oila shu kunning o‘zida yarashdi.