Xalıq deputatları Bozataw rayonlıq Kenesi, Ózbekstan Liberal-demokratiyalıq partiyasınan saylanǵan deputatlar, J.Jumanazarov hám B. Nurlımuratovalar tárepinen Qusxanataw APJ aymaǵındaǵı ónermentler tigiw cexında bolıp, ol jerdegi jumıslar menen keń túrde tanıstı.

Ilaj dawamında olar Tigiw cexında jumıs alıp barıp atırǵan tiginshilegiń jumıs sharayatı, olardıń kúndelikli ónim islep shıǵarıw processin jaqınnan kózden ótkerdi.

«Margulan ónermentleri» tigiw cexı tiykarınan xalıq paydalanıw mólsherlengen bolıp kiyim-kenshekler, arnawlı buyırtpalar boyınsha tigilgen ónimler tayarlanıwǵa mólsherlengen.

Deputatlar ónimlerdiń sapasına, dizaynına hám bazar talaplarına sáykes keliwi boyınsha alıp barılıp atırǵan jumıslarǵa joqarı baha berdi. Sonday-aq, olar tigiw cexınıń bazar ekonomikasındaǵı áhmiyeti, sondayaq bunday kásip iyeleri uztaz shákirt tayarlawda hám qosımsha jumıs orınların jaratıwda salmaqlı úles qosatuǵınlıǵın atap ótti.

Ushırasıw dawamında ónermentler tárepinen birqatar mashqalalar kóterildi.

Atap aytqanda, zamanagóy tigiw mashinaları hám úskenelerge bolǵan talap jıl sayın artıp barmaqta, sonday-aq, tayar kiyim-kensheklerdi bazarǵa shıǵarıw hám satıw bazarın keńeytiw máselesi atap ótildi. 

Ayırım ónermentler kreditler alıwdaǵı qıyınshılıqlar hám qollap-quwatlaw mexanizmleriniń jeterli emesligi haqqında pikirlerin bildirdi.

Deputatlar kóterilgen barlıq máselerdi tereń úyrenip, olardı sistemalı túrde sheshiw boyınsha tiyisli mákemeler hám uyımlar menen birgelikte jumıs alıp barıwın ayttı. 

Sonday-aq, olar ónermentlerdi qollap-quwatlaw, kásiplik sheberligin rawajlandırıw, ásirese tiginshilik tarawın keńeytiw boyınsha baslamaların ámelge asırıw zárurligin atap ótti.

Ilaj juwmaǵında deputatlar bunday cexlardıń sanın kóbeytiw, olarǵa qolaylı sharayatlar jaratıw hám aymaq ekonomikasın rawajlandırıwda ónermentlerdiń ornın kúsheytiw boyınsha jumıslar dawam ettiriletuǵının bildirdi.