Shomanay rayonı orayında jaylasqan 13-sanlı Jumabay Jıraw Bazarov atındaǵı balalar Muzika hám kórkem-óner mektebi imaratında "Úsh áwlad ushırasıwı" shólkemlestirildi. Ilajdı rayon hákiminiń orınbasarı A.Bekmuratov kiris sóz benen ashıp berdi. Oǵan, Qaraqalpaqstan Respublikası Joqarǵı Keńesiniń komitet baslıǵı Sh.Ótemisov, "Nuranıy qorı" Qaraqalpaqstan Respublikası bóliminiń baslıǵı T.Abdijabbarov, "Nuranıy qorı" Shomanay rayonlıq bóliminiń baslıǵı D.Niyetullaev, rayonda mádeniyat tarawında kóp jıllar dawamında miynet etken  nuranıylar, orta áwlad wákilleri hám jaslar qatnastı.

Ushırasıw dawamında nuranıylar ózleriniń turmıslıq tájiriybeleri, uzaq jıllıq miynet jolları hám turmıslıq sabaqları haqqında jaslarǵa aytıp berdi. Ásirese, watansúyiwshilik, milliy qádiriyatlardı qásterlep saqlaw, úlkenlerge húrmet hám jaslardıń keleshektegi juwapkershiligi haqqında qızǵın pikirler bildirildi. Orta áwlad wákilleri bolsa búgingi kúnde jaslar ushın jaratılıp atırǵan imkaniyatlar, olardıń bilim alıwı hám kásip-óner ielewi áhmiyetli ekenligine toqtap ótti.

Ushırasıw dawamında jaslar da óz pikir-usınısların bildirip, nuranıylarımızdıń másláhát hám usınısların úlken qızıǵıwshılıq penen tıńladı. Bunday ushırasıwlar jaslardı milliy qádiriyatlarǵa húrmet ruwxında tárbiyalaw jáne jámiyette awızbirshilik ortalıǵın ele de kúsheytiwge xızmet etetuǵını ayrıqsha atap ótildi.

Bunnan soń, ilaj shólkemlestirishiler tárepinen tayarlanǵan koncert baǵdarlaması menen dawam etti.