Xalq deputatlari Qo‘shko‘pir tuman Kengashi deputati Ro‘zmetova Gulsara Sapaevna Ko‘ktom mahallasida aholi muammolarini o‘rgandi

Xalq deputatlari Qo‘shko‘pir tuman Kengashi deputati Ro‘zmetova Gulsara Sapaevna Ko‘ktom mahallasining Bekturon ko‘chasida bo‘lib, aholi bilan uchrashdi hamda fuqarolarni qiynab kelayotgan muammolarni o‘rgandi.

Muloqot davomida mahalla aholisini ichimlik suvi bilan ta’minlash masalasida qator muammolar mavjudligi, xususan, ichimlik suvining xonadonlarga o‘z vaqtida va yetarli miqdorda yetib bormayotgani ma’lum bo‘ldi.

Deputat fuqarolarning murojaatini e’tiborga olib, mazkur masalani tegishli mutasaddi tashkilotlar oldida ko‘tarish, muammoni qonuniy tartibda hal etish maqsadida deputatlik so‘rovi kiritishini ma’lum qildi.

Aholi murojaatlari va ularning qonuniy manfaatlarini himoya qilish, hududdagi mavjud muammolarni tizimli ravishda o‘rganish hamda ularning amaliy yechimini ta’minlash deputatning doimiy e’tiborida bo‘lishi ta’kidlandi.