MANZILLI OʻRGANISHLAR: AHOLI BANDLIGINI TAʼMINLASH USTUVOR YOʻNALISHDA 

Xalq deputatlari Quva tuman Kengashi deputati Y.Axmadaliyev hamda kotibiyat bosh
mutaxasissi M.To‘xtasinovlar tomonidan tumandagi Yangichek mahalla fuqarolar
yigʻinida aholini oilaviy tadbirkorlikka keng jalb etish, ularga amaliy koʻmak
koʻrsatish hamda doimiy qoʻllab-quvvatlash ishlarining holatini oʻrganish
maqsadida manzilli oʻrganishlar olib borildi. Jarayonda mahalla masʼullari va
hokim yordamchisi tomonidan amalga oshirilayotgan ishlar atroflicha tahlil
qilinib, mavjud imkoniyatlar va muammolar oʻrganildi. 

Oʻrganishlar davomida sohani yanada rivojlantirish, ayniqsa kam taʼminlangan, daromadi past
hamda doimiy bandligi taʼminlanmagan fuqarolarni tadbirkorlikka jalb etishga
ustuvor ahamiyat qaratish zarurligi taʼkidlandi. Shuningdek, ilgʻor
tajribalarni keng ommalashtirish, samarali loyihalarni qoʻllab-quvvatlash va
aholi oʻrtasida targʻibot ishlarini kuchaytirish boʻyicha aniq taklif va
tavsiyalar berildi. Ushbu yoʻnalishdagi ishlar deputat tomonidan doimiy
nazoratga olindi. 

Bundan tashqari, deputat ajratilgan imtiyozli kredit mablagʻlari asosida oʻz
tadbirkorlik faoliyatini yoʻlga qoʻygan, xususan, tomorqadan samarali
foydalanish maqsadida issiqxona tashkil etgan xonadonlarda ham boʻlib, ularning
faoliyati bilan yaqindan tanishdi. Mazkur oʻrganishlar orqali aholining daromad
manbalarini oshirish, bandligini taʼminlash va tadbirkorlik muhitini yanada
yaxshilash boʻyicha amaliy chora-tadbirlarni belgilashga alohida eʼtibor
qaratildi.