YANGICHEK MAHALLASIDAGI 52-SON MTT REKONSTRUKSIYASI DEPUTAT NAZORATIDA 

Xalq deputatlari Quva tuman
Kengashi deputati Y.Axmadaliyev tomonidan O‘zbekiston Respublikasi
Prezidentining 2025-yil 27-dekabrdagi “2026-2028 yillarda O‘zbekiston
Respublikasining ijtimoiy va ishlab chiqarish infratuzilmasini rivojlantirish
chora-tadbirlari to‘g‘risida”gi PQ–393-son Qarori ijrosini ta’minlash maqsadida
amaliy o‘rganish ishlari olib borildi.
Xususan, tumandagi Yangichek mahallasi hududida joylashgan 52-son maktabgacha
ta’lim tashkilotida olib borilayotgan rekonstruksiya ishlarining borishi joyiga
chiqib ko‘zdan kechirildi. O‘rganish jarayonida qurilish
ishlarining sifati, belgilangan muddatlarga rioya etilishi, loyiha hujjatlariga
muvofiqligi hamda ob’ektda mehnat xavfsizligi qoidalariga amal qilinishiga
alohida e’tibor qaratildi.
Mazkur qurilish ishlari
“EFFEKT ELEGANT” MChJ tomonidan amalga oshirilmoqda. Loyihaga ko‘ra, maktabgacha ta’lim tashkiloti binosi zamonaviy talablar
asosida qayta rekonstruksiya qilinib, 2 qavatli, barcha qulayliklarga ega holda
barpo etilmoqda. Muassasa 260 nafar bolani qamrab olish imkoniyatiga ega
bo‘lib, bolalar uchun barcha sharoitlar - o‘quv xonalari, o‘yin maydonchalari,
oshxona va sanitariya-gigiena infratuzilmalari yangilangan holda tashkil
etiladi.
Loyihaning umumiy qiymati 4
milliard 485 million 411 ming so‘mni tashkil etib, ushbu mablag‘lar doirasida
ob’ektni belgilangan muddatlarda va yuqori sifat bilan foydalanishga topshirish
rejalashtirilgan.
O‘rganish yakunida deputat tomonidan mas’ul tashkilot va pudratchiga qurilish
ishlarini yanada jadallashtirish, sifat ko‘rsatkichlarini ta’minlash hamda
belgilangan muddatlarga qat’iy rioya qilish yuzasidan tegishli tavsiya va
ko‘rsatmalar berildi.