Urganch shahrida infratuzilmani yaxshilash va hududlarni obodonlashtirish ishlari jadal sur’atlarda davom etmoqda. 

 Bugun Xalq deputatlari Urganch shahar Kengashi raisi P.Ro‘ziboyev hamda shahar Kengashi deputati F.Rahmonov hududlardagi ko‘chalarni asfaltlashtirish hamda obodonlashtirish jarayonlarini joyiga chiqib, bevosita o‘rgandilar. O‘rganishlar davomida asosiy e’tibor nafaqat bajarilayotgan ishlarning sifatiga, balki ularning uzoq muddatli xizmat qilishi uchun aholining daxldorlik hissini oshirish masalasiga qaratildi. 

Xalq deputatlari shahar Kengashi raisi P.Ro‘ziboyev ta’kidlaganidek, mahallalardagi bunyodkorlik ishlari faqatgina tashkilotchilar tomonidan emas, balki aholining
bevosita ishtiroki va doimiy nazorati ostida amalga oshirilishi kerak. Bu — nafaqat ishlarning sifatli bo‘lishiga, balki fuqarolarda «bu mening mahallam, mening ko‘cham» degan daxldorlik hissini shakllantirishga, pirovard natijada, mahallaning ko‘rkamligini uzoq vaqt saqlab qolishga xizmat qiladi. 

 O‘rganish jarayonida mas’ullarga qurilish ishlaridagi ayrim kamchiliklarni o‘z vaqtida bartaraf etish, infratuzilmani loyiha asosida sifatli topshirish hamda aholining asosiy takliflarini inobatga olish bo‘yicha aniq topshiriqlar berildi. 

Deputat F.Rahmonov esa, o‘z navbatida, har bir mahalla fuqarolar yig‘inida «Jamoatchilik nazorati guruhlari»ning samarali ishlashini yo‘lga qo‘yish va bu
orqali hudud obodligini ta’minlashda fuqarolar tashabbuskorligini oshirish masalalariga alohida to‘xtalib o‘tdi. 

 Ta’kidlanganidek, mahalla – bizning umumiy uyimiz. Uning obodligi va ko‘rkamligi har birimizning faol ishtirokimizga, olib borilayotgan islohotlarga befarq bo‘lmasligimizga bog‘liq.