Navoiy shahridagi sport klubi faoliyati o‘rganildi: rekonstruksiya va modernizatsiya masalalari kun tartibida

Xalq deputatlari Navoiy shahar Kengashi deputati Muxiddin Kalonov tomonidan Navoiy shahridagi sport klubi faoliyatini o‘rganishga qaratilgan amaliy tashrif amalga oshirildi.

Mazkur o‘rganish jarayonida sport klubining bugungi holati har tomonlama tahlil qilinib, uning infratuzilmasi, sport inshootlarining texnik holati, mavjud sharoitlar hamda sportchilar va yoshlar uchun yaratilgan imkoniyatlar batafsil ko‘zdan kechirildi. Shuningdek, klubda olib borilayotgan mashg‘ulotlar sifati, to‘garaklar faoliyati, murabbiylar ish uslubi va sportchilarning natijalariga alohida e’tibor qaratildi.

O‘rganishlar davomida sport klubi faoliyatida qator yutuqlar bilan bir qatorda ayrim kamchiliklar ham aniqlandi. Xususan, ayrim sport inshootlarining eskirgani, zamonaviy talablarga javob bermaydigan jihozlar mavjudligi, mashg‘ulotlar uchun zarur inventarlarning yetarli emasligi qayd etildi. Bundan tashqari, binolarning ayrim qismlari ta’mirtalab holatga kelib qolgani, muhandislik-kommunikatsiya tarmoqlarini yangilash zarurati borligi ta’kidlandi.

Shu munosabat bilan sport klubini qayta rekonstruksiya qilish, uning moddiy-texnik bazasini to‘liq yangilash, zamonaviy sport jihozlari bilan ta’minlash hamda sportchilar uchun qulay va xavfsiz shart-sharoitlar yaratish bo‘yicha aniq chora-tadbirlar belgilab olindi. Klub infratuzilmasini bosqichma-bosqich modernizatsiya qilish, yangi sport maydonchalari va mashg‘ulot zallarini barpo etish bo‘yicha takliflar ilgari surildi.

Shuningdek, mas’ul mutasaddilarga aniqlangan kamchiliklarni qisqa muddatlarda bartaraf etish, mavjud imkoniyatlardan samarali foydalanish, yoshlar va aholini sportga keng jalb etish hamda ommaviy sport tadbirlarini ko‘paytirish yuzasidan tegishli topshiriqlar berildi.

Ushbu tashrif va o‘rganish ishlari sport klubi faoliyatini yangi bosqichga olib chiqish, uni zamonaviy talablar asosida rivojlantirish hamda yoshlar o‘rtasida sog‘lom turmush tarzini keng targ‘ib etishga xizmat qiladi.