QUVADAGI YIRIK LOYIHA: ISTIROHAT BOGʻI YANGILANMOQDA 

Xalq deputatlari Quva tuman Kengashi deputatlari
B.Abduraximov, M.Sayfidinov, M.Raximov, M.Axmadaliyeva, Kengash kotibiyati
mudiri R.Nodirov hamda bosh mutaxassis M.Toʻxtasinovlar tomonidan Oʻzbekiston Respublikasi
Prezidentining 2025-yil 1-apreldagi “Respublika hududlarini jadal kompleks
rivojlantirish uchun tanlab olingan tuman (shahar)larda amaliy
chora-tadbirlarni amalga oshirish toʻgʻrisida”gi PQ-132-son Qarori ijrosini
taʼminlash maqsadida tuman markazida joylashgan Alisher Navoiy nomli
koʻngilochar istirohat bogʻini zamonaviy shaharsozlik va arxitektura talablari
asosida qayta barpo etish boʻyicha olib borilayotgan ishlar yuzasidan
navbatdagi oʻrganish ishlari tashkil etildi. 

Oʻrganish jarayonida deputatlar tomonidan obyektda amalga
oshirilayotgan qurilish va rekonstruksiya ishlarining borishi, ularning sifati,
belgilangan muddatlarga muvofiqligi hamda loyiha hujjatlariga mosligi
atroflicha koʻzdan kechirildi. Shuningdek, masʼul tashkilot va pudratchilar
ishtirokida amalga oshirilayotgan ishlar yuzasidan muhokamalar oʻtkazilib,
mavjud muammo va kamchiliklar aniqlandi. 

Deputatlar tomonidan qurilish ishlarini jadallashtirish,
sifatini oshirish, aholi uchun qulay va xavfsiz shart-sharoitlar yaratish yuzasidan
masʼullarga tegishli tavsiya va topshiriqlar berildi hamda ushbu jarayon
ustidan doimiy deputatlik nazorati oʻrnatilishi taʼkidlandi. 

Qarorga muvofiq, mazkur istirohat bogʻini davlat-xususiy
sheriklik asosida 7,8 gektar maydonda tubdan rekonstruksiya qilish, loyiha
doirasida hududning infratuzilmasini toʻliq yangilash, yashil hududlarni
kengaytirish, zamonaviy yoritish va xavfsizlik tizimlarini joriy etish ishlari
amalga oshirilmoqda. Yangilangan bogʻ hududida bolalar uchun xavfsiz va zamonaviy
oʻyin maydonchalari, savdo va umumiy ovqatlanish shoxobchalari, qulay
mehmonxona, yopiq akvapark, yoshlar markazi, sport va madaniy tadbirlar
oʻtkazish maydonlari hamda oilaviy dam olish uchun barcha shart-sharoitlar
yaratilishi koʻzda tutilgan.