Aholiga ko‘rsatilayotgan tibbiy xizmatlar holati o‘rganildi

Xalq deputatlari Navoiy shahar Kengashi kotibiyati mudiri Jo‘rabek Hafizov hamda shahar Kengashi deputati Erkin Navro‘zovlar tomonidan Travmatologiya va ortopediya ilmiy-amaliy tibbiyot markazi Navoiy viloyati filiali faoliyati o‘rganildi.

O‘rganishlar davomida ma’lum bo‘lishicha, mazkur filial Navoiy shahar tibbiyot birlashmasiga qarashli 1-son oilaviy poliklinikaning 2 va 3-qavatlarida beg‘araz ijara asosida joylashgan. Qisqa vaqt ichida filialda 300 dan ortiq jarrohlik amaliyotlari o‘tkazilib, malakali shifokorlar tomonidan bemorlarga sifatli tibbiy xizmatlar ko‘rsatib kelinmoqda.

Deputatlar hamda partiya faollari bemorlar va tibbiyot xodimlari bilan bevosita muloqot olib borib, mavjud muammolar, kamchiliklar hamda erishilayotgan natijalar yuzasidan fikr almashdilar.Shuningdek, o‘rganishlar jarayonida filial joylashgan binodagi lift qurilmasi nosoz holatda ekani va boshqa qator muammolar aniqlanib, ularni bartaraf etish yuzasidan mas’ullar bilan muhokamalar o‘tkazildi. Aniqlangan kamchiliklarni qisqa muddatda hal etish masalasi deputatlik nazoratiga olindi.

Mazkur o‘rganishlar hududda tibbiy xizmat sifatini yanada yaxshilash, aholiga qulay va xavfsiz sharoit yaratish yo‘lida muhim qadam bo‘lib xizmat qiladi.