Sayyor qabul natijasi - muammolar joyida tahlil qilindi va takliflar berildi

Davlatobod MFYda o‘tkazilgan sayyor qabulda 490-sonli DMTTdagi mavjud muammolar o‘rganilib, ularni bartaraf etish bo‘yicha aniq takliflar ishlab chiqildi.

Xalq deputatlari Uchtepa tuman Kengashi deputati, Kengash raisi Jafar Ismanovning “Davlatobod” MFYda o‘tkazilgan sayyor qabuli davomida fuqarolar tomonidan bildirilgan murojaatlar asosida manzilli o‘rganish ishlari tashkil etildi. Unda Kengash kotibiyati mudiri A.Usmanov, Byudjet komissiyasi raisi J.Karimov hamda kotibiyat bosh mutaxassisi U.Abilovlar ishtirok etdi.

O‘rganishlar jarayonida okrug hududida joylashgan 490-sonli davlat maktabgacha ta’lim tashkilotining bugungi holati atroflicha ko‘zdan kechirildi. Aniqlanishicha, muassasada 2018 va 2022-yillarda joriy ta’mirlash ishlari amalga oshirilgan bo‘lsa-da, mavjud infratuzilma bugungi talab darajasiga to‘liq javob bermaydi. Hozirgi kunda bog‘chaga 180 nafar bola qatnamoqda, biroq navbatda turgan bolalar soni 500 nafardan ortiqni tashkil etayotgani hududda maktabgacha ta’limga bo‘lgan ehtiyoj yuqori ekanini ko‘rsatadi.

Tahlil davomida muassasa binosining ayrim qismlarida kamchiliklar mavjudligi aniqlandi. Xususan, deraza romlari eskirgani sababli ularni yangilash zarurati mavjud, tom qismi esa eski shifer qoplamadan iborat bo‘lib, bu kelgusida noqulayliklar keltirib chiqarishi mumkin. Shuningdek, hududni o‘rab turgan panjaralar ham eskirgan bo‘lib, xavfsizlik talablariga to‘liq javob bermaydi.

Mazkur holatlar muassasaning moddiy-texnik bazasini mustahkamlash, bolalar uchun qulay va xavfsiz sharoitlar yaratish zarurligini ko‘rsatdi. Shu asosda mavjud muammolarni bosqichma-bosqich bartaraf etish, ta’mirlash ishlarini amalga oshirish hamda qo‘shimcha quvvatlar yaratish bo‘yicha takliflar ishlab chiqildi.

Yakuniy xulosa sifatida ushbu masalani belgilangan tartibda Kengashning tegishli doimiy komissiyasi kun tartibiga kiritish hamda tuman Kengashi sessiyasida ko‘rib chiqish taklif etildi. Fuqarolar murojaati joyiga chiqib o‘rganilib, har bir masala yuzasidan aniq chora-tadbirlar belgilab olindi.