Xalq deputatlari Ishtixon tuman Kengashi deputatlari V.Soliyeva, U.Nurmuxamedov va N.Kiyamov hamda Ishtixon tumani hokimi o‘rinbosari — tuman Obodonlashtirish boshqarmasi boshlig‘i S.Ochilov bilan birgalikda tumandagi 4P58 “Ishtixon shahriga (53 km)” avtomobil yo‘lini 4R48 “Zarafshon trakti” avtomobil yo‘lining 68-kilometri bilan bog‘lovchi ko‘prik va 4,5 kilometr uzunlikdagi aylanma yo‘l qurish ishlari bilan yaqindan tanishdi.

Mazkur loyiha hudud transport infratuzilmasini yanada rivojlantirish, aholi uchun qulay va xavfsiz harakatlanish sharoitlarini yaratish hamda mavjud yo‘l tarmoqlaridagi yuklamani kamaytirish maqsadida amalga oshirilmoqda. Ayniqsa, ushbu ko‘prik va aylanma yo‘lning barpo etilishi tumanning ichki yo‘llarida yuzaga kelayotgan transport tirbandliklarini kamaytirish, og‘ir yuk tashuvchi transport vositalarining aholi yashash hududlari orqali harakatlanishini cheklashda muhim ahamiyat kasb etadi.

Shuningdek, yangi aylanma yo‘lning qurilishi orqali transport oqimini muqobil yo‘nalishlarga yo‘naltirish imkoniyati yaratiladi. Bu esa yo‘l harakati xavfsizligini ta’minlash, mavjud avtomobil yo‘llarining xizmat muddatini uzaytirish hamda hududning logistika salohiyatini oshirishga xizmat qiladi.

Tanishuv jarayonida mutasaddilar tomonidan olib borilayotgan qurilish ishlari sifati, belgilangan loyiha talablari asosida bajarilishi hamda qurilish muddatlariga rioya etilishi masalalariga alohida e’tibor qaratildi. Shu bilan birga, mazkur loyiha yakuniga yetkazilgach, tumanning transport qatnovi tizimida sezilarli yengilliklar yuzaga kelishi, aholi va tadbirkorlik subyektlari uchun yanada qulay imkoniyatlar yaratilishi ta’kidlab o‘tildi.

Hudud infratuzilmasini takomillashtirishga qaratilgan bunday loyihalar kelgusida iqtisodiy faollikni oshirish, yangi investitsiya loyihalarini jalb etish hamda aholining turmush farovonligini yuksaltirishga xizmat qilishi bilan ahamiyatlidir.