Tashrif davomida D.Normuradova muassasada bolajonlar uchun yaratilgan zamonaviy shart-sharoitlar, o‘quv xonalari, yotoqxonalar hamda oshxonaning holati bilan yaqindan tanishdi. Shuningdek, binoning isitish tizimi hamda hududni obodonlashtirish ishlariga alohida e’tibor qaratildi.

Kengash raisi tarbiyachilar va muassasa ma’muriyati bilan muloqotda bo‘lib, o‘quv-tarbiya jarayoniga zamonaviy pedagogik texnologiyalarni joriy etish, bolalarning intellektual salohiyatini oshirish hamda ularning sog‘lom ovqatlanishini tashkil etish bo‘yicha o‘z tavsiyalarini berdi.

"Yangi qurilgan ushbu muassasa nafaqat mahalla farzandlari uchun quvonchli sovg‘a, balki sifatli ta’limning ilk bosqichidir. Bizning asosiy maqsadimiz — bolajonlarimizning zamonaviy, shinam va xavfsiz maskanlarda kamol topishini ta’minlashdir", — deb ta’kidladi D.Normuradova.

Ma’lumot o‘rnida aytish joizki, bunday yangi muassasalarning foydalanishga topshirilishi mahallada maktabgacha ta’lim qamrovini sezilarli darajada oshirishga va yangi ish o‘rinlari yaratilishiga xizmat qiladi.