Aholi va qishloq xo‘jaligini ro‘yxatga olish jarayonlarining borishi yuzasidan deputat munosabati

Bugungi kunda mamlakatimizda aholi va qishloq xo‘jaligini ro‘yxatga olish ishlari izchil va tizimli ravishda amalga oshirilmoqda. Ushbu jarayon aholining ijtimoiy-iqtisodiy holatini, qishloq xo‘jaligi sohasidagi mavjud imkoniyatlar va muammolarni aniqlash, kelgusidagi davlat dasturlarini samarali rejalashtirishda muhim ahamiyat kasb etadi.

Ro‘yxatga olish tadbirlari belgilangan reja asosida, zamonaviy axborot texnologiyalaridan foydalangan holda olib borilmoqda. Jarayonda maxsus tayyorgarlikdan o‘tgan ro‘yxatga oluvchilar ishtirok etib, aholi bilan bevosita muloqot qilish, ma’lumotlarni aniq va xolis to‘plashga alohida e’tibor qaratilmoqda.

Mazkur masala yuzasidan Xalq deputatlari Navoiy shahar Kengashi deputati N. Xudoyqulova o‘z munosabatini bildirib, quyidagilarni ta’kidladi:

“Aholi va qishloq xo‘jaligini ro‘yxatga olish — bu shunchaki statistik tadbir emas, balki hududlarni rivojlantirish, aholi farovonligini oshirishga qaratilgan muhim jarayondir. To‘planadigan ma’lumotlar asosida ijtimoiy sohalar, qishloq xo‘jaligi infratuzilmasi, bandlik va tadbirkorlikni rivojlantirish bo‘yicha aniq qarorlar qabul qilinadi. Shu bois har bir fuqaroni ushbu jarayonda faol ishtirok etishga chaqirib qolaman.”

Deputat, shuningdek, ro‘yxatga olish jarayonlarida ochiqlik va shaffoflik ta’minlanayotganini, aholiga qulay sharoitlar yaratilganini alohida qayd etdi. Uning so‘zlariga ko‘ra, fuqarolar tomonidan taqdim etilayotgan ma’lumotlar qonunchilikka muvofiq ravishda maxfiy saqlanadi va faqat umumlashtirilgan holda tahlil qilinadi.

Xulosa qilib aytganda, aholi va qishloq xo‘jaligini ro‘yxatga olish jarayonlari Navoiy shahrida belgilangan talablar asosida olib borilmoqda. Ushbu tadbirning muvaffaqiyatli o‘tkazilishi kelgusida hududni kompleks rivojlantirish va aholi turmush darajasini yanada oshirishga xizmat qiladi.

Xalq deputatlari Navoiy shahar Kengashi deputati,

Xudayqulova Nargiza Gaybullayevna