G‘uzor tumanida transport sohasini rivojlantirish, aholiga qulay va xavfsiz yo‘lovchi xizmati ko‘rsatishni yo‘lga qo‘yish maqsadida tuman hokimi Bekzod Suyunov hamda Qashqadaryo viloyati Transport boshqarmasi boshlig‘i Bobur Yazdanov tumandagi avtoshohbekat faoliyati bilan yaqindan tanishdi.

Tashrif davomida avtoshohbekatning hozirgi holati, uning infratuzilmasi, texnik imkoniyatlari hamda tadbirkor tomonidan amalga oshirilayotgan ishlar o‘rganildi.

Ushbu avtoshohbekat xususiy tadbirkor Xabiba Xoliyorova tomonidan faoliyat yuritib kelmoqda. Ayni paytda uning kirish va chiqish yo‘laklarida keng ko‘lamli taʼmirlash va obodonlashtirish ishlari olib borilmoqda.

Shuningdek, avtoshohbekat faoliyatini yanada samarali tashkil etish, yo‘lovchilarga xizmat ko‘rsatish madaniyatini oshirish, hududda qo‘shimcha qulayliklar yaratish borasida ham taklif va tavsiyalar berildi.

Uchrashuv yakunida ushbu loyiha nafaqat tadbirkorlikni qo‘llab-quvvatlash, balki tumanda transport sohasini rivojlantirishga ham xizmat qilishi qayd etildi.